Azərbaycan Dövlət İqtisad Universitetində (ADİU) görkəmli alim, iqtisad elmləri doktoru, professor, əməkdar müəllim Telman Hüseynovun 80 illik yubileyi qeyd olunub.

Mərasimi giriş sözü ilə açan universitetin rektoru, professor Ədalət Muradov yubilyarı təbrik edərək bildirib ki, Telman Hüseynov görkəmli alim olmaqla yanaşı, həm də gözəl pedaqoqdur. O, ömrünün 60 ildən çoxunu iqtisadçı mütəxəssis, pedaqoq və alimlərin hazırlanmasına həsr edib. Onun zəngin elmi-pedaqoji təcrübəsi və yüksək təşkilatçılıq qabiliyyəti bizim üçün bir məktəbdir. Respublikamızın müasir iqtisadi həyatında belə alimlərə daim böyük ehtiyac var.

Sonra ADİU-nun professoru Ə.Əlirzayev T.Hüseynovun həyatı və pedaqoji fəaliyyəti haqqında məruzə ilə çıxış edib. Bildirib ki, Telman Hüseynov respublikamızın ən qabaqcıl iqtisadçılarından biridir. O, sənaye iqtisadiyyatı sahəsində nəinki respublikamızda, hətta bu sahədə çalışan MDB dövlətlərinin mütəxəssisləri arasında özünün xüsusi çəkisi olan alimdir. Onun elmi-tədqiqat obyekti Azərbaycanın milli iqtisadiyyatının formalaşmasında, inkişafında xüsusi yeri və rolu olan neft-maşınqayırma sənayesi ilə üzvi surətdə bağlıdır. Telman müəllim ömrünün ən məhsuldar, kamil çağlarını bu mühüm strateji əhəmiyyətə malik olan sahənin dərin tədqiqatlarına həsr edib. Ali məktəbdə işlədiyi 55 ilə yaxın müddətdə müəllim, baş müəllim, dosent, professor, kafedra müdiri, fakültə dekanı, prorektor və rektor əvəzi vəzifələrində çalışıb. İşlədiyi müddətdə onlarca elmlər namizədi və elmlər doktoruna rəhbər və məsləhətçi olub, uzun müddət Azərbaycan Respublikasının Prezidenti yanında Ali Attestasiya Komissiyasının Ekspert Şurasının sədr müavini işləyib. Professor T. Hüseynov 15 adda monoqrafıya, dərslik, dərs vəsaitinin, habelə 150-dən çox elmi məqalə və tədris proqramlarının müəllifıdir. O, elmi nailiyyətlərinə görə 1991-ci ildə “Əməkdar iqtisadçı”, 2006-cı ildə “Əməkdar müəllim” fəxri adlarına layiq görülüb, 2011-ci ildə isə “Şöhrət” ordeni ilə təltif edilib.

Daha sonra ADİU-nun professorları A.Şəkərəliyev, M.Əhmədov, M.Məmmədov və digər iştirakçılar çıxış edərək yubilyarın ünvanına təbriklərini səsləndiriblər.

Mərasimin sonunda yubilyar ona ünvanlanan səmimi təbriklərə görə tədbir iştirakşılarına öz təşəkkürünü bildirib. Gənc iqtisadçıların hazırlanmasında bundan sonra da əlindən gələni əsirgəməyəcəyini qeyd edib.

Elnarə ÖMƏROVA