Respublikanın digər rayonlarında olduğu kimi, Balakəndə də Beynəlxalq  Əlillər Günü yüksək səviyyədə  qeyd olunmuşdur. Həmin  gün Balakəndə  yaşayan  əlillərin bir çoxu “Balakən” şadlıq evində  onların şərəfinə təşkil edilən  tədbirə  dəvət edilmişdi. Tədbirdə Balakən Rayon İcra Hakimiyyətinin  başçısı İslam Rzayev çıxış edərək qonaqları  təbrikini çatdırdı.

Natiq qeyd etdi ki, Beynəlxalq Əlillər Günü  ulu öndər  Heydər Əliyevin  sərəncamı ilə 1994-cü ildən qeyd olunur. O, ölkəmizdə əlillərə göstərilən qayğıdan danışdı, onların problemlərinin həllinin daim dövlətimizin diqqət mərkəzində saxlanıldığını bildirdi. İslam Rzayev dedi ki, əlillərin rifah halının yaxşılaşdırılması, onların problemlərinin həlli möhtərəm Prezidentimiz İlham Əliyevin daim diqqət yetirdiyi məsələlərdəndir. Natiq bildirdi ki, Balakəndə dövlət qayğısına ehtiyacı olan 6217 əlil var. Onların 113-ü Qarabağ  müharibəsi  əlilidir. İcra hakimiyyətinin rəhbəri onu da vurğuladı ki, əlillərə qayğı  bizim həm insanlıq, həm də mənəvi  borcumuzdur. Bu sahə ilə  bağlı Azərbaycan dövlətinin sosial siyasəti var.

Rayon Əmək və Əhalinin Sosial Müdafiəsi Mərkəzinin direktoru H.Razıyev, Sosial Müdafiə  Fondu Balakən filialının rəis əvəzi  Rauf Qaracayev, Qarabağ Veteranları, Əlilləri və Şəhid Ailələri  İctimai Birliyinin  rayon şöbəsinin  sədri S.Şibliyev, Mərkəzi Xəstəxananın  baş həkimi  H.Nuriyev, rayon Ağsaqqallar Şurasının  sədri  R.Musayev əlilləri bu xoş  gün  münasibətilə təbrik  etdilər.

Sonda  təbrik üçün  meydan  rayonun incəsənət ustalarına verildi.

İlqar MUSAOĞLU,
“Xalq qəzeti”nin bölgə müxbiri