...Əməliyyat müşavirəsi  uzun çəkmədi: daxil olmuş məlumatın  dəqiqliyi şübhə doğurmurdu. Bununla belə,  inanmaq  da çətin idi. Hətta ən dəqiq  məlumatı olan əməliyyatçılar da tərəddüd içindəydilər. Ancaq gecikmək də olmazdı. Müəyyən olunmuş vaxta cəmi bir saat  qalırdı. Oğrunu, yaxud oğruları  cinayət  başında yaxalamaq  üçün elə  indi hərəkətə keçmək, müəyyən olunmuş  ünvanda müşahidə yerlərini tutmaq  və s.  tələb olunurdu.

 Bərdə Rayon Polis Şöbəsinin rəis müavini  Natiq Hüseynovun qəti  qənaəti belə  oldu: əməliyyat qrupu gecikmədən lazımi yerlərdə öz mövqelərini tutsunlar. Əməliyyata rəhbərliyi  isə  polis polkovnik-leytenantı Natiq Hüseynov öz üzərinə götürdü.

Gecə saat 4-ün  yarısı  idi. Bu vaxt, adətən, yuxunun şirin  vədəsi olur.  Ancaq o, artıq ayaqüstə idi. Vərdiş öz işini görürdü: axır  zamanlar o evdən bax, bu vaxt -  gecə saat 4-ün yarısında çıxırdı.Yorğun, bir qədər  də  əsəbi idi. Ancaq bu,  uzun çəkmədi. Yay gecəsinin sərin  havası üz-gözünə səpələndi. Yavaş-yavaş özünə gəldi.  Evdə hamının yatdığına  tam əmin olandan sonra həyət  qapısını  ehmalca açıb yola çıxdı.

Gedəcəyi ünvan  kəndin o biri tərəfindəydi. Fikirləşdi ki, kəndarası yolla getmək  uzaq  düşər. Həm də  yolda-izdə görüb-eləyən  olar. Düzdür, ilk  baxışda bu görkəmdə onu  tanımaq çətin idi. Başında  qalın qıllı papaq, əynində gödəkcə, uzun  şalvar, ayağında rezin  çəkmə...

Hər  ehtimala  qarşı kəsə getməyi  qərara aldı. Bu isə  o qədər də asan  deyildi. Həyətlərdən,  bağ-bostanlardan keçmək lazım idi. Bir  tərəfdən  də  kənd  itləri.  Ancaq məsələnin  maraqlı  tərəfi o  idi ki,  bu  insana  ən quduz  it  də  hürmürdü.

Dəqiqələr, saniyələr ötüb keçirdi. Əməliyyatçılar   əvvəlcə  nəzərdə tutulmuş yerlərdə mövqe seçmişdilər. Ona görə də çağırılmamış qonağı  addım-addım izləmək imkanları  vardı. O isə  bəzən izi itirmək  üçün  tamam əks tərəfə irəliləyir, təzədən geri dönürdü. Belə  vəziyyətdə onu  hiss etdirmədən izləmək olduqca çətin idi. Digər bir  məsələ ondan ibarət idi ki, bu insanda  quş cəldliyi vardı,  bir  göz qırpımında yayına bilirdi.

Ancaq  yüksək  peşəkarlıq,  hər  şeyin əvvəlcədən dəqiq ölçülüb-biçilməsi, operativlik öz nəticəsini verdi: çağırılmamış qonaq   cinayət  başında - öz həmkəndlisinin tövləsindən  qoyunları oğurlayarkən yaxalandı.

Əziz  oxucu, təsvir  etdiyimiz bu  hadisə  2014-cü ilin may ayında Bərdə  rayonunun Şahvəllər  kəndində  baş vermişdi. Ən maraqlısı isə  odur ki,  artıq  neçə aydan bəri  Şahvəllər kəndini qorxu və vahimə içərisində saxlayan, silsilə oğurluq  hadisələrini törədən şəxs elə həmin  kəndin  sakini 25 yaşlı Ceyhunə Mehdiyeva idi: özü də bu onun doğulub- böyüdüyü  həmin  kənddə törətdiyi  nə az, nə çox, düz 5-ci oğurluq  idi.

Natiq Hüseynov  təcrübəli əməliyyatçıdır. Polis orqanlarında uzun müddət müxtəlif vəzifələrdə çalışdığı illərdə çox hadisələrlə, çox insanlarla  rastlaşıb. Bununla bərabər, öz təəccüb və  heyrətini də  gizlədə bilmir:

– Qəribə və  maraqlı  cəhət təkcə o deyil ki, silsilə oğurluq  hadisələrini törədən  şəxs 25 yaşlı  qızdır. Bizi  narahat edən bir də odur ki, bu hadisə onun valideynlərinin  gözü qarşısında baş verib. Bu  bir daha onu göstərir ki, adamlar  arasında  kütləvi-izahat işlərini, hər vasitə ilə profilaktik tədbirləri gücləndirmək lazımdır.

Dindirmə zamanı əlimizə onun gələcək planlarını əks etdirən cədvəl keçdi.  Burada  ayrı-ayrı  ünvanlar  və  insan  adları  yazılmışdı. Özü də bu siyahıya təkcə Bərdə deyil, ətraf rayonların sakinləri  də  daxil  idi.

Biz uğurlu  əməliyyatlardan ancaq biri  haqqında danışdıq. Qeyd  etmək  yerinə  düşər ki, son vaxtlar Bərdədə cinayətkarlığa  qarşı  belə  uğurlu əməliyyat-istintaq tədbirləri tez-tez keçirilir.  Onlardan bəzilərini misal çəkmək istəyirik:  Əvəz Qurbanovdan, Səbuhi İmranovdan, eləcə də Ruslan  Şükürovdan, Nicat Abdullayevdən və Pərvin Əsgərovdan ibarət silahlı  dəstələrin ifşa edilməsi,  rayonun Qaradağlı kəndində narkotik  maddə olan çətənə plantasiyasının aşkar edilməsi və s. Adlarını  çəkdiyimiz və çəkmədiyimiz bu əməliyyat-istintaq tədbirlərində  polis  şöbəsinin işçilərindən  Hikmət  İsmayılov,  Oqtay Məmmədov,  Əvəz Alışov,  Nofəl Paşayev, Qorxmaz Abbasov,  Rövşən Məmmədov, Rafət Quliyev,  Şamxal Babayev,  Ruslan  Əhmədov,  Vahid  Həmzəyev,  Rafiq  Süleymanov  və  başqaları  xüsusilə fərqlənmişlər.

 Aparılan təhlil və   müqayisələr göstərir ki,  Bərdə  Rayon  Polis  Şöbəsinin şəxsi heyəti  cinayətkarlığa qarşı mübarizə, ictimai qaydaların və ümumi təhlükəsizliyin təmini, insan və  vətəndaş  hüquq və  azadlıqlarının qorunması sahəsində xeyli müsbət təcrübə toplamışdır. Digər  hüquq-mühafizə  və  xüsusi  xidmət orqanları ilə  qarşılıqlı  əlaqə şəraitində həyata keçirilən  əməliyyat-istintaq  tədbirləri  nəticəsində əvvəlki  illərin müsbət meyilləri qorunub saxlanılmış və  bir çox istiqamətlər üzrə  daha da inkişaf etdirilmişdir.

Əldə  edilən bu uğurlar  isə,  hər şeydən  əvvəl, Azərbaycan Respublikasının  Prezidenti İlham Əliyevin fərman və  sərəncamlarından, dövlət proqramlarından, DİN-in əmr, göstəriş  və  kollegiya  qərarlarından  irəli gələn  vəzifələrin icrasına şöbə  rəhbərliyinin xüsusi diqqəti  və şəxsi heyətin  xidməti  vəzifələrinə məsuliyyətlə  yanaşması  nəticəsində  qazanılmışdır.

2014-cü  ilin 6 ayı ərzində Bərdə  rayonu  ərazisində cəmi 150  cinayət  hadisəsi  qeydə  alınmışdır ki, onlardan  da 135-nin, yəni 88,8 faizinin açılması  təmin  edilmişdir.

 Bərdə  rayon PŞ-nin əməkdaşlarının əhali  arasında apardıqları  profilaktik  tədbirlər nəticəsində qanunsuz  saxlanılan 1 ədəd “Smith S Vesson” markalı 7,62 mm revolver,  1 ədəd 5,6 mm çaplı TOZ-8 markalı  tir, 1  ədəd 16 çaplı TOZ markalı B-6465 yivsiz  ov,  1 ədəd 32  çaplı TOZ  markalı 10302 yivsiz ov tüfəngləri, 70  ədəd 7,62 çaplı  avtomat patronu, 4  ədəd  avtomat  sandığı, 1 ədəd  F-1 əl qumbarası toplanaraq  aidiyyəti üzrə DİN-in  Təhcizat İdarəsinin  anbarına  təhvil verilmişdir.

Narkomanlığa  və narkotik  vasitələrin qanunsuz  dövriyyəsinə qarşı  mübarizə  istiqamətində bir sıra  işlər görülmüşdür. 2014-cü  ilin 6  ayı  ərzində rayon ərazisində bu növ cinayətlər üzrə 15 kriminal hadisə  aşkar  edilmişdir ki,  onlardan da 5 fakt satış  məqsədi olmadan, qanunsuz olaraq şəxsi  istehlakdan artıq miqdarda əldə etmə və ya saxlama, 10 fakt isə satış  məqsədilə qanunsuz əldə  etmə ilə bağlı olmuşdur. Qeyd  edilən faktlar  üzrə 3,106 qram narkotik vasitə olan  heroin, 2,388 qram  çəkidə  tiryək aşkar olunaraq maddi  sübut  kimi götürülərək dövriyyədən çıxarılmışdır. Bununla  bağlı olaraq 15 nəfər  təqsirləndirilən  şəxs  cinayət  məsuliyyətinə, 2  nəfər  isə inzibati  məsuliyyətə cəlb  edilmişdir.

Bu  müddətdə Bərdə  RPŞ-nin istintaq bölməsində 161  cinayət işi istintaq  edilmişdir. İstintaqı  tamamlanmamış 82  cinayət işindən 86 nəfər  təqsirləndirilən  şəxs haqqında 72 iş ittihamnamə  aktı ilə, 2  iş isə tibbi  xarakterli  məcburi tədbirləri tətbiq etmə qərarı ilə  məhkəməyə  göndərilmişdir. 8  cinayət  işinin icraatına  xitam verilmiş, 24 cinayət  işinin  istintaqı isə dayandırılmışdır.

Rayon ərazisində yol  hərəkətinin  təhlükəsizliyinin təmin  olunması  məqsədilə Yol Polisi Bölməsinin  əməkdaşları  tərəfindən bir sıra  profilaktiki tədbirlər  həyata  keçirilmişdir. Təkcə 2014-cü ilin 6 ayı ərzində DYPB-nin əməkdaşları 3580 yol hərəkəti qaydaları əleyhinə inzibati xəta aşkar edərək, 3347  nəfər  sürücü   barəsində inzibati  protokol  tərtib etmişlər. Ümumi aşkarlamanın 15,8 faizi kobud  qayda pozuntusu  kimi  qeydə  alınmışdır.

Bu  və ya digər  formada  yol  hərəkəti qaydalarını pozduqlarına görə,  o  cümlədən  116  nəfər  sərxoş vəziyyətdə nəqliyyat  vasitəsini  idarə edən, 638 nəfər ötmə qaydalarını, 30 nəfər sərnişindaşıma qaydasını, 482 nəfər yol  nişanının tələblərini pozan, 370 nəfər  sürücülük hüququ olmadan nəqliyyat vasitəsini idarə edən,  188 nəfər texniki baxışdan keçməyən, 12 nəfər qanunsuz avadanlıqlar quraşdıran, 434 nəfər təhlükəsizlik kəmərindən istifadə etməyən sürücü  aşkar edilmişdir.

Bu dövrdə 3347 ədəd  inzibati protokol  tərtib edilmiş, 8  nəfər  sürücü il  ərzində 12 və daha artıq cərimə balı  topladığına görə 1 il müddətinə sürücülük hüququndan  məhrum  edilmişdir. Baxılmış inzibati  materiallara görə,  sürücülərə 248,735  manat  məbləğində cərimənin  ödənilməsi  təmin edilmişdir. Bu  da  keçən  ilin  müvafiq dövrü ilə müqayisədə 688,47  manat  çoxdur. 

Bərdə Rayon Polis  Şöbəsinin qeydiyyat və  şəxsiyyət  vəsiqəsi bölməsi tərəfindən 2014-cü ilin 6  ayı ərzində 6957 vətəndaşa  şəxsiyyət  vəsiqələri verilmişdir. Onlardan 1597 nəfəri 16  yaşına çatmayan şəxslər, 214  nəfəri  məcburi köçkünlər və s. olmuşdur.

Ümumilikdə, vətəndaşlar  şəxsiyyət  vəsiqələrinin verilməsi ilə  bağlı 5099  manat dövlət  rüsumu ödəmişlər. Vətəndaşların qəbulu, onların ərizə,  şikayət və məktublarına baxılması da diqqət mərkəzindədir. Belə ki, polis  şöbəsinin ünvanına  daxil olan  müraciətlərə, eləcə də  DİN-in “102” zəng-xidməti  vasitəsilə  daxil olan  məlumatlara  baxılması işi  müvafiq  qaydada  tənzimlənmiş  və  ciddi  qüsurlara  yol verilməmişdir.

2014-cü  ilin 6 ayı  ərzində Bərdə  Rayon PŞ-nin ünvanına  vətəndaşlardan 2221 ərizə,  şikayət və  müraciət  daxil olmuşdur. Onlardan da 1849-u ərizə, 372-si  şikayət olmuşdur. Nəzarətdə olan 80 müraciətin hamısının icrası  təmin  edilmişdir. Şöbə rəhbərliyi  501 nəfər vətəndaşı  qəbul etmiş, onlardan 414  vətəndaşın müraciəti  təmin edilmiş, 87 nəfərə izahat  verilmişdir.

Məlumdur ki, respublikanın  işğal edilmiş  rayonlarından olan  məcburi köçkünlərin bir hissəsi Bərdə rayonu ərazisində  məskunlaşmışdır. Başqa  sözlə desək, məcburi köçkünlərin  rayonun  ictimai-siyasi,  sosial və kriminogen durumuna müəyyən təsiri var. Bu  amil isə öz  növbəsində, həmin kontingent ilə  əlaqədar  müvəqqəti yaşayış yerində ortaya çıxan bir sıra  məqamlara xüsusi diqqət yetirilməsini və onların arasında müvafiq  məqsədyönlü tədbirlərin həyata keçirilməsini  tələb edir.

Məcburi köçkünlərin  müraciətlərinə  bilavasitə yerlərdə baxılması məqsədilə əraziləri işğal olunmuş  Ağdam, Laçın, Kəlbəcər və digər rayon polis şöbələrinin  rəhbərliyi  ilə  mütəmadi əlaqələr saxlanılır, mövcud problemlər vaxtında öz həllini  tapır. Bərdə Rayon  Polis Şöbəsinin   rəisi,  polis polkovniki Hikmət Quliyev də nikbin  və  qətiyyətlidir. O,  cinayətkarlığa  qarşı  mübarizə,  ictimai  asayişin qorunması sahəsində əldə edilmiş uğurlarla kiyafətlənmir. Daha  çox görüləcək  işlərdən,  qarşıda duran  vəzifələrdən  söhbət açır:

- Bu gün, bütövlükdə,  respublikamızda  olduğu  kimi, Bərdə rayonunda da  nəhəng layihələr həyata keçirilir, genişmiqyaslı tikinti-quruculuq və  abadlıq işləri  aparılır. Qədim Bərdə son illər tanınmaz dərəcədə dəyişmiş,  daha abad, müasir və gözəl olmuşdur. Deməli, cinayətkarlığa qarşı mübarizədə, ilbəil  artan iqtisadi potensialın, dinamik inkişafın və yüksəlişin başlıca şərti olan sabitliyin, əmin-amanlığın təmin edilməsi, insan hüquq və azadlıqlarının qorunması sahəsində  Azərbaycan Respublikasının Prezidenti İlham Əliyevin müəyyən etdiyi  hədəflər fəaliyyətimizin əsasını təşkil edəcəkdir.

Böyük inamla demək olar ki, dəfələrlə  xalqa, vətənə, dövlətçiliyə və peşə borcuna, anda sədaqət və fədakarlıq nümunələri göstərmiş daxili işlər orqanlarının, o cümlədən Bərdə Rayon Polis Şöbəsinin şəxsi heyəti respublikamıza ləyaqətlə  xidmət edəcək, cinayətkarlığa qarşı mübarizədə, ictimai qaydanın qorunması və  ictimai təhlükəsizliyin təmin edilməsi sahəsində qanunvericiliklə üzərlərinə düşən məsul vəzifələrin öhdəsindən layiqincə gələcək. Şöbənin əməkdaşları ulu öndər Heydər Əliyevin haqlı olaraq dövlət müstəqilliyinin qazanılmasından sonra ikinci ən böyük nailiyyət saydığı sabitliyin, əmin-amanlığın, insan və vətəndaş hüquq və azadlıqlarının nümunəvi şəkildə təmin edilməsində öz layiqli sözünü deyəcəklər.

Ziyəddin SULTANOV, 

“Xalq qəzeti”nin bölgə müxbiri