Yeni tədris ilinin başlanması və Bilik Günü münasibəti ilə Bakının Nəsimi və Binəqədi rayonları  ərazisində yaşayan, qayğıya ehtiyacı olan uşaqlar dərs ləvazimatlarından ibarət hədiyyələrlə sevindirilib.

Bu barədə Qan Donorları Assosiasiyasının mətbuat xidmətindən bildirilib. Xeyriyyə aksiyası Qan Donorlarları Assosiasiyası, “Gənclərin Həmrəyliyinə Dəstək” İctimai Birliyi, “Gənc Həvəskar İdmançılar” İctimai Birliyi, Azərbaycan Qızıl Aypara Cəmiyyətinin Nəsimi və Binəqədi rayon bölmələri, Nəsimi Rayon Gənclər və İdman İdarəsinin təşkilatçılığı və İNCİ dəftərxana, məktəb və ofis ləvazimatları şirkətinin maliyyə yardımı ilə baş tutub.

Xoşniyyətli aksiyanın təşkilatçıları valideyn himayəsindən məhrum, qayğıya ehtiyacı olan və maddi təminatları zəif ailələrdə böyüyən uşaqlarla görüşmüş, onlara məktəb ləvazimatlarından ibarət hədiyyələr təqdim etmişlər. Ailələrdə də görüş keçirmiş xeyriyyəçilər onların şəraiti ilə tanış olmuş, balaca məktəblilərin arzularını dinləmişlər. Onlara verilən hədiyyələri sevinclə qarşılayan uşaqlar yeni tədris ilində dərslərini əla oxuyacaqlarını bildirmişlər.

Qeyd edilmişdir ki, bu cür xoşməramlı aksiyalar davamlı olacaqdır.

Əfsanə BAYRAMQIZI,

 “Xalq qəzeti”