Yeni Azərbaycan Partiyası  Nizami rayon təşkilatının qərargahında növbəti dərs ili qarşısında aztəminatlı, Qarabağ müharibəsi əlili və şəhid ailəsi nümayəndələri ilə görüş keçirilib. YAP Nizami rayon təşkilatının sədri, Milli Məclisin deputatı Sədaqət Vəliyeva qarşıdan gələn Bilik Günü münasibətilə valideynləri və şagirdləri təbrik edib.

Rayon təşkilatının rəhbərliyi ənənəvi olaraq hər il Bilik Günü ərəfəsində ərazidə yaşayan imtiyazlı və maddi ehtiyac duyan ailələrinin üzvləri ilə görüşür, onların övladlarına məktəb çantası və dərs ləvazimatı hədiyyə edir. Belə humanitar aksiyaların ümummilli lider Heydər Əliyevin tövsiyəsi olduğunu  bildirən Sədaqət Vəliyeva deyib ki,  ulu öndər daim imkansız ailələrin ehtiyaclarını nəzarətdə saxlayır, hamını onlara kömək etməyə çağırırdı.

Biz bu tövsiyəyə sadiq qalaraq həmişə aztəminatlılara diqqət göstərməyi özümüzə borc bilirik. Partiyamız daim humanizm mövqeyindən çıxış edərək bu cür tədbirləri gələcəkdə də davam etdirəcəkdir.

Valideynlər göstərilən diqqət və qayğıya görə ölkə Prezidenti İlham Əliyevə və xanımı Mehriban Əliyevaya, eyni zamanda, Yeni Azərbaycan Partiyasının rəhbərliyinə minnətdarlıq ediblər. Sonda bu il 1-3-cü siniflərə gedəcək 140-dən artıq uşağa məktəb çantası və dərs ləvazimatı, bəzi imkansız ailələrin övladlarına məktəbli forması hədiyyə olunub.

“Xalq qəzeti”