Ölkəmizdə valideyn himayəsindən məhrum və aztəminatlı ailələrdən olan uşaqlar daim dövlətimizin diqqət və qayğısı ilə əhatə olunublar.  Onların sağlam böyümələri, biliklərə yiyələnmələri, milli-mənəvi  dəyərlərimizə sadiq şəxsiyyət kimi formalaşması məqsədilə davamlı tədbirlər  həyata keçirilir.

Nəsimi rayonunda da həmin istiqamətdə zəruri işlər görülür, bu uşaqlara daim diqqət göstərilir.

Yeni dərs ili ərəfəsində Nəsimi Rayon İcra Hakimiyyətində aztəminatlı ailələrdən olan və valideyn himayəsindən məhrum uşaqlarla görüş keçirildi. Əvvəlcə uşaqlara operativ idarəetmə mərkəzində rayonun maketi nümayiş etdirildi və onlara sosial-iqtisadi sahədə görülən işlərdən danışıldı.

Nəsimi Rayon İcra Hakimiyyəti başçısının müavini Gülarə Verdiyeva uşaqları yeni dərs ili münasibətilə təbrik etdi və onlara müvəffəqiyyət arzuladı. O, son illər ölkəmizdə təhsilin inkişafında böyük uğurlar əldə edildiyini, gənclərimizin biliklərə yiyələnməsi, o cümlədən xüsusi qayğıya ehtiyacı olan uşaqların təhsil almaları və dəyərli vətəndaş kimi formalaşmaları üçün bütün zəruri tədbirlərin həyata keçirildiyini vurğuladı. Fiziki və mənəvi cəhətdən sağlam, müasir biliklərə yiyələnmiş gənclik müstəqil Azərbaycanımızın gələcək uğurlarının və daha  da qüdrətlənməsinin təminatçısıdır. Məhz buna görə, təhsil Azərbaycanda dövlət siyasətinin prioritet istiqamətlərindən biridir.

Həmin gün 200-dən çox valideyn himayəsindən məhrum və aztəminatlı ailədən olan uşağa məktəbli geyim forması və dərs ləvazimatı verildi.

Ayaz HƏMİDOĞLU,

“Xalq qəzeti”