M-3 avtomagistralının Hacıqabul-Bəhramtəpə hissəsinin 9-cu kilometrliyində Kür çayı üzərindəki körpünün tikintisi başa çatdırılıb.

Bu barədə “APA-Economics”ə Nəqliyyat Nazirliyi “Azəryolservis” ASC-dən bildirilib.

Körpünün uzunluğu 317,7 metr, qabariti Q-11,5, eni 14,85 metr təşkil edir. Körpünün aşırım tirləri kəsilməyən monolit dəmir-beton tir olaraq, 3 aşırımdan ibarətdir. Orta aşırım tirlərinin uzunluğu 140 metr, kənar tirlərin uzunluğu isə, 82 metr təşkil edir. Aşırım tirlərinin en kəsiyi “korobka” şəkilli (içərisi boş) olmaqla, kənar hissələrdə hündürlüyü 8,5 metr, orta hissədə isə 3,5 metr təşkil edir.

Xatırladaq ki, Kür çayı üzərindəki bu körpüdə, son illərdə ağıryüklü maşınların intensiv hərəkəti ilə əlaqədar olaraq tez-tez aşırım tavalarında çökmələr baş verir, nəqliyyatın hərəkəti dayandırılırdı. Sürücülər alternativ, daha uzun yollardan istifadə etməli olurdu ki, bu da sürücülərin və sərnişinlərin haqlı narazılığına səbəb olurdu.