AzərTAc xəbər verir ki, bu sözləri avqustun 20-də “Fairmont Baku” otelində tələbələr arasında könüllülüklə bağlı keçirilmiş sorğunun nəticələrinə həsr olunan mətbuat konfransında “Bakı-2015” Avropa Oyunlarının (BEGOC) əməliyyatlar üzrə baş direktoru Saymon Kleqq deyib.

O, hazırda BEGOC-da 670 peşəkarın çalışdığını, onların 400-nün azərbaycanlı olduğunu, 70 faizini gənclərin təşkil etdiyini bildirib.

S.Kleqq deyib ki, artıq “Bakı-2015” Oyunları Akademiyasının ilk buraxılışı gerçəkləşib. Dörd hissədən ibarət layihənin birinci mərhələsində 45 gənc iştirak edib. Onlar arasında Portuqaliya, Türkiyə, Xorvatiya və digər ölkələrdən olan könüllülər də var. Gələn həftə akademiyanın ikinci mərhələsi start götürəcək.

İlk Avropa Oyunlarına 12 min könüllünün cəlb olunacağını bildirən baş direktor mötəbər yarışda idmanın 19 növü üzrə 6 mindən artıq atletin mübarizə aparacağını diqqətə çatdırıb. Qeyd edib ki, könüllülər oyunların keçiriləcəyi 20 idman obyektində fəaliyyət göstərəcəklər. Mötəbər turnirdə könüllü kimi iştirak etmək üçün 9 minə yaxın müraciət daxil olub. Bu proses hazırda davam edir.

Oktyabrda həmin gənclərlə müsahibələr təşkil olunacaq və gələn ilin yanvarında onların bölgüsü aparılacaq. Gənclər Fondunun ilk Avropa Oyunları ilə bağlı onlarla layihəyə qrant ayırdığını bildirən S.Kleqq bu xəttin bundan sonra da davam edəcəyini bildirib. 

O deyib ki, tələbələr arasında könüllülüklə bağlı keçirilən sorğu 109 təhsil müəssisəni əhatə edib. Azərbaycanda indiyədək keçirilən ən böyük sorğuda 150 min 403 gənc yeddi sualı cavablandırıb. Sorğu iştirakçılarının 71 faizi Azərbaycanın birinci Avropa Oyunlarına ev sahibliyi etməsinin bu ölkə üçün çox əhəmiyyətli olacağına inanır. İyirmi altı mindən çox iştirakçı isə BEGOC-un oyunların keçirilməsi ilə bağlı nəzərdə tutduğu 12 min könüllüdən biri olmaq üçün ərizə verməyi səbirsizliklə gözləyir.