Bu yaxınlarda  Azərbaycanda təhsil alan xarici tələbələrin iştirakı ilə “Azərbaycan - ikinci Vətənim” devizi altında II festival keçirilib. Azərbaycan Respublikasının Prezidenti yanında Gənclər Fondunun maliyyələşdirdiyi, “İnnovasiyaya doğru” Gənclərə Dəstək İctimai Birliyinin həyata keçirdiyi tədbir gənclər tərəfindən maraqla qarşılanıb.

Festivala qatılan əcnəbi tələbələrin fərqli və özünəməxsus çıxışları alqışlarla qarşılanıb.  Kimisi Azərbaycan milli musiqisindən sevdikləri mahnıları oxuyub, kimisi “Azərbaycan təbiəti”, “Tarixi diyar” və s. mövzularda fotosərgilər təqdim edib, kimisi də milli musiqi alətlərimizdə ifası ilə sevgisini nümayiş etdirib. “İnnovasiyaya doğru” Gənclərə Dəstək İctimai Birliyinin  sədri Rəşad Cəfərov bildirib ki, festivalın keçirilməsində əsas məqsəd ölkəmizdə təhsil alan əcnəbi tələbələrə  Azərbaycanın mədəni irsini, adət-ənənələrini, musiqisini daha yaxından tanıtmaq, bu gənclərin öz ölkələrinə qayıtdıqdan sonra, Azərbaycanla bağlı həqiqətləri dolğun və obyektiv öz ictimaiyyətlərinə çatdırmasına nail olmaqdır.  Onun sözlərinə görə, artıq ölkəmizdə təhsil alan əcnəbi gənclərin əksəriyyəti Azərbaycan dilində danışa bilir,  milli mədəniyyətimiz, musiqimizlə bağlı yetərli təəssüratları var. Biz çalışırıq ki, əcnəbi gənclər harda yaşamalarından asılı olmayaraq,  Azərbaycanın dostu olsunlar.

Məlumat verildi ki,  növbəti illərdə də bu cür festivalların keçirilməsi planlaşdırılır.

Əfsanə BAYRAMQIZI, “Xalq qəzeti”