Dünən Ağstafada faşizm üzərində Qələbənin 73-cü ildönümü münasibəti ilə Böyük Vətən Müharibəsi iştirakçıları ilə görüş olub. Ağstafa şəhər sakini, ikinci Dünya Müharibəsinin iştirakçısı Abdulla Əliyevin yaşadığı evdə keçirilən tədbirdə rayon icra hakimiyyətinin başçısı Məhərrəm Quliyev, hüquq-mühafizə orqanlarının rəhbərləri, ictimaiyyət nümayəndələri iştirak ediblər.

          Çay süfrəsi arxasında keçən görüşdə rayon cra hakimiyyətinin başçısı Qələbənin 73-cü ildönümü münasibətlə veteranları təbrik etmiş, 2-ci dünya müharibəsi illərində Azərbaycan vətəndaşlarının göstərdikləri igidlik və qəhrəmanlıqları barədə geniş söz açmışdır. Qeyd olunub ki, ulu öndərimiz Heydər Əliyev hakimiyyətdə olduğu bütün dövrlərdə müharibə veteranlarının problemlərinə xüsusi diqqət yetirib, onlara hərtərəfli qayğı ilə yanaşıb və sosial məsələlərinin həlli istiqamətində mühüm addımlar atıb. Bu gün də Azərbaycan Respublikasının Prezidenti cənab İlham Əliyevin rəhbərliyi ilə veteranlar və onların ailələrinin sosial rifahının yüksəldilməsi istiqamətində mühüm tədbirlər icra olunur.

          Çıxış edən veteranlar və rayon ictimaiyyətinin nümayəndələri dövlətimizin onlara hər zaman göstərdiyi yüksək diqqət və qayğıya görə ölkə başçısına dərin minnətdarlıqlarını ifadə ediblər.

          Tədbirdə veteranlarla xatirə şəkli çəkdirilmiş, onlara qiymətli hədiyyələr təqdim olunmuşdur.

                   Hamlet Qasımov,
«Xalq qəzeti»nin bölgə müxbiri