Bu gün minlərlə Gəncə sakini Heydər Əliyev park-kompleksinə gəlmişdi. Bu park şəhər əhalisinin və qonaqların ən çox sevdiyi yerdir. Parkın son illər daha da gözəlləşməsini bir də onunla izah etmək olar ki, şəhər sakinləri boş vaxtlarında burada ağaclara qulluq etməyi, yaşıllıqların sayını artırmağı, az qala hər kolun nazını çəkməyi sevirlər. Elə şəhər icra hakimiyyətinin Yeni Azərbaycan Partiyası  şəhər təşkilatı ilə birgə ulu öndər Heydər Əliyevin anadan olmasının 95-ci ildönümü münasibəti ilə təşkil olunan ağacəkmə aksiyası da bu xeyirxah təşəbbüslərin növbəti mərhələsi idi, "Hərəmiz bir ağac əkək" devizi ilə park-kompleksin ərazisində  10 min şam ağacı əkildi. Şəhər ictimaiyyəti və partiya fəalları burada təmizlik-abadlıq işləri apardı, ərazini alaq otlarından, daşlardan təmizlədi, yeni əkilən ağacları suvardı, əvvəllər basdırılan tinglərə aqrotexniki qaydada qulluq göstərdilər.

Aksiya gənclərin şən ifa və rəqsləri ilə müşayiət olundu. Qeyd edək ki, gənc fəallar hər həftə mütəmadi olaraq Heydər Əliyev park-kompleksinin ərazisində iməcilik təşkil edir, əkilən ağaclara qulluq göstərirlər.

Hamlet Qasımov,
"Xalq qəzeti"nin bölgə müxbiri