Samuxda 2018-ci ilin  birinci rübünün yekunları müzakirə olunub. Rayon icra hakimiyyətinin başçısı Alı Qocayevin məruzəsində və digər çıxışlarda rayon iqtisadiyyatının inkişafındakı artım dinamikası konkret rəqəmlərlə göstərilib. Məsələn, hesabat dövründə rayon üzrə  ümumi  məhsul  buraxılışının həcmi 26,7 milyon  manat  olmuşdur  ki,  bu  da ötən ilin müvafiq dövründəkindən    10,9  faiz  çoxdur.  Cari  ilin üç   ayında ötən  ilin  müvafiq  dövri  ilə  müqayisədə sənaye məhsulunun həcmi 38,3 faiz artaraq 2,8 milyon manat,    kənd  təsərrüfatı  məhsullarının həcmi 8,6  faiz  artaraq  11,4 milyon  manat,  tikinti 14,9 faiz artaraq  2,6 milyon manat təşkil etmişdir.   Hesabat dövründə pərakəndə  əmtəə  dövriyyəsi  4,7 faiz, əsas kapitala yönəldilən investisiya 10,9 faiz artmışdır.         
           «Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı»nın yerinə yetirilməsi ilə bağlı  rayonda görülən işlər bir qədər də sürətləndirilmişdir. Bu günlərdə Burunqovaq kəndində inşa edilmiş modul tipli məktəb binasının tikintisi başa çatdırılaraq istifadəyə verilmişdir.     
Şəhərin  prospekt və bir sıra küçələrində abadlıq və yenidənqurma işləri başa çatdırılmışdır. Hazırda rayonun Çobanabdallı kəndində  yataqxana tipli, ikimərtəbəli bir bloklu, hər biri 16 mənzilli, ümumi sahəsi 2020 kvadratmetr olan iki binada blokların təmiri, qapı və pəncərələrin quraşdırılması işləri aparılır. İstixana kəndində ikimərtəbəli, iki bloklu, hər biri 12 mənzilli, sahələri 1445 kvadratmetr olan iki binada isə təmir-bərpa işlərinə başlamaq üçün hazırlıq işləri görülür.       

Uzunluğu 15,3 kilometr olan İnstitut - Çobanabdallı-Lək- Əli Bayramlı və uzunluğu 12,7 kilometr olan Yenikənd -Qırmızı Samux kəndlərarası avtomobil yollarında yenidənqurma və bərpa işlərinə başlanmışdır. Artıq həmin yolların torpaq yatağının bərbası, qazıntı və su keçidlərinin quraşdırılması işləri başa çatmışdır.
Azərbaycan kənd investisiya layihəsi çərçivəsində rayonun Qırmızı Samux qəsəbəsində, Yenikənd, Lüksemburq, Çobanabdallı, Qarabağlar və Əli Bayramlı kəndlərində daxili yolların təmir-bərpa işlərinə başlamaq üçün sənədləşmə işləri başa çatmışdır. Yaxın vaxtlarda işlərə start  veriləcəkdir.
          Rayon ərazisində iri təsərrüfatların yaradılması istiqamətində işlər davam etdirilmişdir. Hazırda rayonda “AQRO DAİRY” Məhdud Məsuliyyətli Cəmiyyət, “Boz dağ”  heyvandarlıq kompleksi,  “Ulduz 2011” MMC, “Qarabağ Region MKT” MMC , Vest Milk MMC, Murovdağ Kəndli fermer təsərrüfatı, Heyvandarlıq və Yemçilik müəssisəsi, “Region Aqro” MMC kimi  iri sahibkar təsərrüfatları fəaliyyət göstərir. Eyni zamanda rayonda  153  müasir  istixana fəaliyyət göstərir ki,  onların da ümumi sahəsi 72 hektardan çoxdur.  Bu istixanalarda il ərzində 8000 tondan cox faraş tərəvəz - pamidor, xiyar yetişdirilir. Məhsulların cox hissəsi MDB ölkələrinə ixrac     olunur.
          İlin əvvəlində rayonda  əhalinin məşğulluğu sahəsində yaranmış problemin aradan qaldırılması məqsədi ilə ölkə başçısının tapşırığı əsasında yeni iş yerlərinin yaradılması və ictimai işlərin təşkili istiqamətində tədbirlər həyata keçirilmişdir. Belə ki, rüb ərzində 79-u daimi olmaqla 271 yeni iş yeri yaradılmışdır.     
          Ölkə Prezidentinin respublikamızda kənd təsərrüfatının inkişaf etdirilməsinin daha da sürətləndirilməsi ilə bağlı tapşırıq və tövsiyələrinin, imzaladığı sərəncamlardan  irəli gələn vəzifələrin icrasını təmin etmək məqsədi ilə  rayonda  cari ildə  sahələrdən yüksək məhsul əldə etmək üçün lazımi tədbirlər həyata keçirilmişdir. 2018-ci  ilin  məhsulu  üçün 9924,0  hektar  sahədə taxıl əkilmişdir ki, onun da  6293,0 hektarı  buğda,  3629,0  hektarı  dən  üçün  arpadır.
Cari ildə 2167 hektar sahədə  yazlıq  bitkilərin  səpini    aparılmışdır.  Onlardan 807,0 hektarı şəkər çuğunduru, 869,0 hektarı dən üçün günəbaxan,  168,0  hektarı  kartof, 323 hektarı  tərəvəzdir. Ölkə başçısının şəkər cuğunduru əkininin stimullaşdırılması ilə bağlı imzaladığı məlum sərəncamdan sonra bu sahəyə diqqət daha da artmışdır. Cari ildə 1000 hektardan yuxarı şəkər çuğunduru əkilməsi proqnozlaşdırılır.

…Yığıncaqda belə bir fikir dönə-dönə vurğulanıb ki, Samuxda bütün sahələrdə inkişaf, tərəqqi var. Lakin arxayınlaşmağa heç bir əsas yoxdur. Gərək bütün imkanlardan maksimum istifadə olunsun.

Hamlet Qasımov,
«Xalq qəzeti»nin bölgə müxbiri