Azərbaycan Respublikasının Prezidenti İlham Əliyev oktyabrın 26-da Yaponiyanın ölkəmizdə yeni təyin olunmuş fövqəladə və səlahiyyətli səfiri Şusuke Vatanabenin etimadnaməsini qəbul etmişdir.
Səfir fəxri qarovul dəstəsinin önündən keçdi.
Diplomat etimadnaməsini Prezident İlham Əliyevə təqdim etdi.
Sonra Azərbaycan Prezidenti səfirlə söhbət etdi.
Səfir Şusuke Vatanabe Yaponiyanın İmperatoru əlahəzrət Akihitonun salamlarını dövlətimizin başçısına çatdırdı. Səfir qeyd etdi ki, əlahəzrət Akihitonun qəbulunda olarkən İmperator ölkələrimiz arasında əlaqələrin daha da inkişaf etdirilməsi ilə bağlı istəyini ifadə etmişdir. Səfir Şusuke Vatanabe ölkəmizin təkcə təbii sərvətlərlə deyil, insan resursları ilə də zəngin olduğunu vurğuladı.
Prezident İlham Əliyev səfirin Azərbaycanda fəaliyyəti dövründə əlaqələrimizin uğurla inkişaf edəcəyinə əminliyini bildirdi və ölkələrimiz arasında münasibətlərin yaxşı tarixi olduğunu dedi. Azərbaycan ilə Yaponiyanın müxtəlif sahələrdə fəal əməkdaşlıq etdiyini vurğulayan Prezident İlham Əliyev bu əlaqələrin yaxşı nəticələr verdiyini qeyd etdi. İqtisadi əlaqələrimizin daha da genişlənəcəyinə ümidvar olduğunu deyən dövlətimizin başçısı Yaponiya şirkətləri ilə əməkdaşlığın səviyyəsindən məmnunluğunu bildirdi. Siyasi münasibətlərimizin də çox yaxşı səviyyədə olduğunu deyən Prezident İlham Əliyev bu əlaqələrin bundan sonra da uğurla inkişaf edəcəyinə əminliyini ifadə etdi.
Dövlətimizin başçısı Yaponiyanın İmperatoru əlahəzrət Akihitonun salamlarına görə minnətdarlığını bildirdi, onun da salamlarını Yaponiyanın İmperatoruna çatdırmağı xahiş etdi.
AzərTAc