Mayın 3-də Azərbaycan Prezidenti İlham Əliyev Sumqayıtdakı Cümə məscidində əsaslı təmirdən sonra yaradılan şəraitlə

tanış olmuşdur.

Dövlətimizin başçısı Cümə məscidinin yenidənqurmadan əvvəlki vəziyyətini əks etdirən fotolara baxdı.

Prezident İlham Əliyevə məlumat verildi ki, ibadətgahın təməli 1989-cu ildə qoyulmuşdur. 2003-cü ildə istifadəyə verilən məscidin ərazisi 4,5 hektardır. Burada, eyni zamanda, 500 nəfər ibadət edə bilər. Məscid 2011-ci ilin iyulunda Azərbaycan Prezidenti İlham Əliyev burada olarkən verdiyi tapşırığa müvafiq olaraq əsaslı təmir edilmişdir. Burada 34 metr hündürlüyündə minarə ucaldılmışdır. Mehrab yenidən qurulmuş, günbəzin daxilinə “Qurani-Kərim”dən ayələr həkk olunmuş, döşəmə əsaslı təmir edilmişdir. Məscidin istilik və elektrik sistemləri də tamamilə yenilənmiş, divarları üzlük daşlarla üzlənmiş, hasarı yenidən qurulmuşdur.

Azərbaycan Prezidenti məscidin axundu ilə söhbət etdi.

Axund Rauf SƏRDAROV dövlətimizin başçısını salamlayaraq dedi:

– Cənab Prezident, şəhərimizə xoş gəlmisiniz! Sizi ikinci dəfə şəhərimizin Cümə məscidində görməyimiz bizi çox sevindirir, xoşhal edir. Siz iki il bundan əvvəl bu məscidə baxmışdınız. Layihə hazırlanması, bərpa işləri görülməsi üçün tapşırıq vermişdiniz.

Allaha şükürlər olsun ki, əsaslı surətdə bərpa olunan, yeni minarəsi tikilən məscidimiz bu gün möminlərin ixtiyarına verilir. Bu, bizi çox sevindirir. Bu, Sizin dinimizə olan məhəbbətiniz və sayğınızdır. Sizə minnətdarıq.

Cənab Prezident! Sizin bu gün buraya gəlişiniz bir neçə cəhətdən bizim üçün bayramdır. Əvvəla, ölkənin rəhbəri şəhərimizə, məscidimizə gəlib. Bu, bizim üçün bayramdır. Bu gün həm də məscidimizin açılışı olacaqdır. Bu, ikinci bayramdır.

Üçüncü bayram isə məscidimizin adı ilə bağlıdır. Bu, Cümə məscidi adlanır. Siz də çox gözəl gündə, cümə günündə buraya gəlmisiniz. Cümə günündə də yüz minlərlə insan bir araya yığışıb ibadət, dua edir. Cümə Allahın rəhminin yerdə nazil olan günüdür.

Bundan əlavə, cənab Prezident, sonuncu peyğəmbərimiz, İslam dininin banisi həzrəti Rəsulullahın qızı Fatimeyi-Zəhranın doğum günüdür. Bu da bir gözəl gündür.

Axund Rauf Sərdarov Sumqayıtdan olan zəvvarların Həcc ziyarətinin təşkilinə görə Prezident İlham Əliyevə minnətdarlıqlarını bildirdi. Eyni zamanda, Azərbaycanda dini-mənəvi dəyərlərin qorunması, məscidlərin, ziyarətgahların inşası və bərpası istiqamətində ulu öndər Heydər Əliyevin həyata keçirdiyi böyük işlərin davam etdirilməsinə görə Prezident İlham Əliyevə təşəkkürünü bildirərək dedi:

– Bütün bunlar üçün biz Sizə təşəkkür edir, ulu öndərə rəhmət diləyirik. Allah Sizi qorusun. Allah Sizə, ailənizə xoşbəxtlik, səadət nəsib etsin. Qoy bu əmin-amanlıq, abadlıq ölkəmizdən heç vaxt əskik olmasın. Cənab Prezident, Allah Sizi hifz etsin.

Dövlətimizin başçısına “Qurani-Kərim” hədiyyə olundu.

Prezident İlham ƏLİYEV: Çox sağ olun. Doğrudan da əlamətdar bir gündür. Mən iki il bundan əvvəl gəlmişdim. Tikinti işlərinə bərabər baxırdıq. İndi ən yüksək səviyyədə tikilibdir. Həm xarici görünüşü, həm daxili tərtibatı gözəldir. Faktiki olaraq, yenidən tikilibdir. Minarəsi tikilibdir. Bütün lazımi şərait vardır. İstilik, kondisioner, böyük həyət vardır. Yəni, burada ibadət üçün bütün imkanlar vardır. Bu məscid bir sənət, memarlıq əsəridir. Elə də olmalıdır. İki minə yaxın məscid vardır. Onların böyük əksəriyyəti müstəqillik dövründə tikilibdir. İndi qədim vaxtlardan bizə miras qalan məscidlərin bərpası ilə də məşğuluq. Bu yaxınlarda Azərbaycanın ən qədim məscidi olan Şamaxı Cümə məscidinin də açılışını edəcəyik. Bu məscid 743-cü ildə tikilibdir. İndi onun yenidən tikilməsi başa çatır. Orada köçürülmələr də var idi, yollar genişləndirildi.

Bakıda dini, tarixi abidələrimizin bərpasından da dəfələrlə söhbət aparmışıq. Təzəpir məscidi, Bibiheybət məscidi, Əjdərbəy məscidi.

Binəqədidə ölkəmizin ən böyük məscidi tikilib. Bu, həm bizim müqəddəs dinimizə olan münasibətimizdir, eyni zamanda, İslam aləmində Azərbaycan indi çox görkəmli yer tutur. İslam Əməkdaşlıq Təşkilatının xətti ilə mötəbər tədbirlər keçirilir. Müsəlman aləmində Azərbaycan çox böyük hörmətə malik olan bir ölkədir. Nəinki Azərbaycanda, müsəlman aləmində İslam həmrəylinin gücləndirilməsi üçün biz əlimizdən gələni əsirgəmirik. Belə gözəl, dini, tarixi abidələrin tikintisi, bərpası bundan sonra da davam etdiriləcəkdir.

AzərTAc