Paris, 9 dekabr (AzərTAc). Xüsusi müxbirimiz xəbər verir ki, dekabrın 9-da Azərbaycan Prezidenti İlham Əliyev Fransa Milli Assambleyasına gəlmişdir.

Milli Assambleyanın binasının qarşısında dövlətimizin başçısının şərəfinə fəxri qarovul dəstəsi düzülmüşdü.
Azərbaycan Prezidentini Fransa Milli Assambleyasının sədri Bernar Akoyer qarşıladı.

Prezident İlham Əliyev və Bernar Akoyer rəsmi foto çəkdirdilər.
Sonra Azərbaycan Prezidenti İlham Əliyevin və Fransa Milli Assambleyasının sədri Bernar Akoyerin görüşü oldu.
Bernar Akoyer bildirdi ki, Fransa Azərbaycana və şəxsən Sizin fəaliyyətinizə maraq göstərir. Parlamentlərarası əlaqələrin uğurla tərəqqi etdiyini bildirən Bernar Akoyer parlametlərarası əməkdaşlığın bundan sonra da inkişafı üçün səylərini əsirgəməyəcəyini dedi. Ölkələrimiz arasında dostluq əlaqələri mövcuddur. Bu, Sizin Fransa Prezidenti Nikola Sarkozi ilə şəxsi münasibətlərinizdə də özünü göstərir.

Ölkələrimiz arasında digər sahələrdə də əlaqələrin uğurla inkişaf etdiyini diqqətə çatdıran B.Akoyer bildirmişdir ki, dünya iqtisadi böhranı dövründə Fransanın Azərbaycan ilə əlaqələri xüsusi əhəmiyyət kəsb edir. Bizim Azərbaycan ilə iqtisadi əlaqələrimiz durmadan inkişaf edir. Fransa üçün Azərbaycan ilə iqtisadi əlaqələr böyük önəm daşıyır. Bu sahədə maraqlarımız bir-birini tamamlayır. İqtisadi sahədə möhkəm olan əlaqələrimizin bundan sonra da genişlənəcəyinə əminəm.

Energetika sahəsində əlaqələri xüsusi qeyd edən Milli Assambleyanın sədri dedi ki, biz enerji təhlükəsizliyi məsələsinə böyük əhəmiyyət veririk və Azərbaycana bu sahədə fəaliyyət göstərən çox mühüm ölkələrdən biri kimi baxırıq.

Azərbaycan Prezidenti İlham Əliyev əmin olduğunu vurğuladı ki, bu səfər münasibətlərimizin inkişafında mühüm addım olacaqdır. Ölkələrimiz arasında münasibətlər dinamik inkişaf edir, geniş sahələri əhatə edir. Dövlətimizin başçısı əmin olduğunu bildirdi ki, əlaqələrimiz gələcəkdə də möhkəmlənəcəkdir. İkitərəfli münasibətlərimiz qarşılıqlı maraqlar üzərində qurulmuşdur və böyük perspektivlərə malikdir.

Siyasi əlaqələrimizin yüksək səviyyədə olduğunu qeyd edən Prezident İlham Əliyev dedi ki, bu, mənim Fransaya üçüncü səfərimdir. Nəzərə alsaq ki, beş ildə bir dövlət və iki rəsmi səfər həyata keçirilib, bu da əlaqələrimizin yaxşı göstəricisidir.
Prezident İlham Əliyev dedi ki, ikitərəfli münasibətlərimiz çoxşaxəlidir. Siyasi, iqtisadi, mədəni və digər sahələrdə əlaqələrimiz güclənir. Parlamentlərarası əməkdaşlığa böyük əhəmiyyət veririk və bu səfər uğurla inkişaf edən ikitərəfli münasibətlərimizin perspektivlərini və həmin sahədə konkret addımları nəzərdən keçirmək üçün yaxşı imkan yaradır.

İqtisadi sahədə də əlaqələrimizin durmadan inkişaf etdiyini diqqətə çatdıran Prezident İlham Əliyev dedi ki, Fransa şirkətləri Azərbaycanda fəaldır. Fransa şirkətləri ilə neft-qaz, energetika və digər sahələrdə fəal əməkdaşlıq edirik.

Dövlətimizin başçısı energetika sahəsində görülən işlər, Azərbaycanın Avropanın enerji təhlükəsizliyinin təminatında rolu və perspektivləri barədə danışdı.

Fransa Milli Assambleyasının sədri Bernar Akoyer Ermənistan-Azərbaycan, Dağlıq Qarabağ münaqişəsi ilə maraqlandı. Prezident İlham Əliyev Dağlıq Qarabağ münaqişəsinin nizama salınması ilə bağlı aparılan danışıqların vəziyyəti və perspektivləri barədə söhbət açdı.

Fransa Milli Assambleyasının sədri Bernar Akoyer dövlətimizin başçısını yola saldı.