Azərbaycan Respublikasının Prezidenti İlham Əliyev yanvarın 19-da Uruqvay Respublikası Prezidentinin xüsusi elçisi, Prezident Administrasiyasının dövlət katibi Diyeqo Kanepanı qəbul etmişdir.

Xüsusi elçi, Prezident Administrasiyasının dövlət katibi Diyeqo Kanepa Uruqvay Respublikasının Prezidenti Xose Alberto Muxica Kordanonun şəxsi məktubunu dövlətimizin başçısına çatdırdı. Diyeqo Kanepa Uruqvay Prezidentinin və hökumətinin Azərbaycan ilə ikitərəfli və çoxtərəfli əlaqələri inkişaf etdirmək və əməkdaşlığımızın perspektivləri ilə bağlı fikir mübadiləsi aparmaq üçün ona birbaşa tapşırıqlar verdiyini dedi. O, ölkəsinin Azərbaycan ilə müxtəlif sahələrdə əlaqələri genişləndirməkdə maraqlı olduğunu bildirdi. Uruqvay Prezidentinin xüsusi elçisi ölkələrimiz arasında əməkdaşlığın inkişaf etdirilməsi üçün yaxşı perspektivlərin olduğunu vurğuladı. Uruqvaylı qonaq ölkəmizə səfəri zamanı paytaxtımızda gedən yüksək inkişaf proseslərinin onda dərin təəssürat yaratdığını dedi.

Dövlətimizin başçısı Uruqvay Respublikasının Prezidenti Xose Alberto Muxica Kordanonun şəxsi məktubuna görə minnətdarlığını bildirdi. Prezident İlham Əliyev müxtəlif səviyyəli qarşılıqlı səfərlərin əlaqələrimizin inkişaf etdirilməsi baxımından rolunu qeyd etdi. Azərbaycan Prezidenti ölkələrimiz arasında güclü tərəfdaşlıq əlaqələrinin qurulacağına ümidvar olduğunu bildirdi.

AzərTAc