Azərbaycan Respublikasının Prezidenti İlham Əliyev noyabrın 9-da Filippin Respublikasının ölkəmizdə yeni təyin olunmuş fövqəladə və səlahiyyətli səfiri xanım Marilin Jusayan Alarillanın etimadnaməsini qəbul etmişdir.
Səfir fəxri qarovul dəstəsinin qarşısından keçdi.
Xanım Marilin Jusayan Alarilla etimadnaməsini Prezident İlham Əliyevə təqdim etdi.
Sonra Azərbaycan Prezidenti İlham Əliyev səfirlə söhbət etdi.
Xanım Marilin Jusayan Alarilla Filippin Respublikasının Prezidenti III Beniqno Akinonun salamlarını və ölkəmizdə gedən sürətli iqtisadi inkişaf proseslərinə görə təbriklərini dövlətimizin başçısına çatdırdı. O, ölkəsinin Azərbaycan ilə əlaqələrin müxtəlif sahələrdə, o cümlədən enerji, elm və texnologiya sahələrində inkişaf etdirilməsində maraqlı olduğunu dedi.
Dövlətimizin başçısı ölkələrimiz arasında ikitərəfli münasibətləri bütün istiqamətlərdə, o cümlədən iqtisadi sahədə inkişaf etdirmək üçün yaxşı potensialın olduğunu dedi. Azərbaycan Prezidenti ölkələrimizin beynəlxalq təşkilatlar, o cümlədən BMT çərçivəsində əməkdaşlığının önəmini vurğuladı. Prezident İlham Əliyev Azərbaycan ilə Filippin arasında güclü iqtisadi tərəfdaşlıq əlaqələri qurmaq üçün qarşılıqlı investisiya imkanlarını nəzərdən keçirməyin və əməkdaşlıq sahələrini müəyyənləşdirməyin zəruriliyini qeyd etdi.
Dövlətimizin başçısı III Beniqno Akinonun salamlarına görə minnətdarlığını bildirdi, onun da salamlarını Filippin dövlətinin başçısına çatdırmağı xahiş etdi.

AzərTAc