Azərbaycan Prezidenti İlham Əliyevin regionlara səfərləri müxtəlif səhiyyə ocaqlarının və digər sosial müəssisələrin tikilib istifadəyə verilməsi baxımından olduqca əhəmiyyətlidir. Belə müəssisələrdən biri - Beyləqan Mərkəzi Rayon Xəstəxanası oktyabrın 28-də istifadəyə verilmişdir. 
Xəstəxana üç hektar ərazidə inşa olunmuşdur. Tikintisinə 2010-cu ilin iyununda başlanılan xəstəxananın ikimərtəbəli binasının ümumi ərazisi 11 min kvadratmetrdir. Müxtəlif şöbələrin fəaliyyət göstərdiyi bu səhiyyə ocağı 140 çarpayılıqdır. Xəstəxananın maddi-texniki bazası ən müasir standartlara cavab verir. Burada 350-dən çox tibb işçisi, o cümlədən 80 həkim əhalinin sağlamlığının keşiyində durur. Xəstəxanada fəaliyyət göstərən şöbələr tibbin ən müasir avadanlığı ilə təchiz edilmişdir. Səhiyyə ocağında yaradılan şərait nəinki beyləqanlılara, eləcə də digər rayonların sakinlərinə ən yüksək səviyyədə tibbi xidmət göstərməyə imkan verir.
Səhiyyə ocağının kollektivi onlara yaradılan şəraiti yüksək qiymətləndirmişlər, Prezident İlham Əliyevə və Azərbaycanın birinci xanımı Mehriban Əliyevaya minnətdarlıqlarını bildirmişlər.

AzərTAc