Azərbaycan Prezidenti İlham Əliyev aprelin 1-də Şirvan şəhərində Müdafiə Sənayesi Nazirliyi Aqreqat İstehsalat Birliyinin telemexanika zavodunda aparılmış yenidənqurma işlərinin gedişi ilə tanış olmuşdur.
Dövlətimizin başçısı zavodun həyətində ulu öndər Heydər Əliyevin büstü önünə gül dəstəsi qoydu.
Sonra Prezident İlham Əliyev zavodda yeni istehsal sahəsini işə saldı.
Məlumat verildi ki, telemexanika zavodu 1981-si ildə fəaliyyətə başlamışdır. 1993-cü ildən 2005-ci ilədək zavod Dövlət Xüsusi Maşınqayırma və Konversiya Komitəsinin tərkibində fəaliyyətini davam etdirmişdir. Telemexanika zavodu 2006-cı ildən Müdafiə Sənayesi Nazirliyinin tabeliyinə verilmişdir. Zavod nazirliyin tərkibinə keçəndən sonra müvafiq bərpa və yenidənqurma işləri aparılmış və yeni istehsal sahələri yaradılmışdır. Prezident İlham Əliyev 2007-ci ilin dekabrında Şirvana səfəri çərçivəsində bu müəssisənin açılışında iştirak etmişdir. Son iki ildə müəssisədə silsilə yenidənqurma tədbirləri həyata keçirilmiş, burada dünyanın inkişaf etmiş ölkələrində istehsal olunan dəzgah, avadanlıq və istehsal xətləri quraşdırılmışdır. Nəticədə qısa müddətdə müəssisə dövlət sifarişlərini yerinə yetirməklə yanaşı, iqtisadiyyatın müxtəlif sahələri üçün də avadanlıq və ehtiyyat hissələrinin istehsalına başlamışdır.
Bildirildi ki, buradakı beş yeni istehsal sahəsində 140-dan çox yeni iş yeri yaradılmışdır. Hazırda müəssisədə 330 nəfər çalışır. Müəssisədə müdafiə təyinatlı məhsullarla yanaşı, müxtəlif növ mülki məhsulların istehsalı da qaydaya salınmışdır.
Dövlətimizin başçısı müəssisədə istehsal olunan məhsullardan ibarət sərgiyə baxdı.
Prezident İlham Əliyev görülmüş işlərdən razılığını bildirdi, tapşırıq və tövsiyələrini verdi.
AzərTAc