İyunun 1-də Bakıda işə başlamış 17-ci Beynəlxalq Xəzər neft, qaz, neftayırma, neft kimyası sərgi və konfransı ilə əlaqədar Böyük Britaniyanın və Amerika Birləşmiş Ştatlarının ölkəmizdəki səfirlikləri birgə rəsmi qəbul təşkil etmişlər.
Tədbirdə Böyük Britaniyanın ölkəmizdəki səfiri xanım Kerolin Braun sərgi və konfransın əhəmiyyətinin ildən-ilə artdığını xüsusi vurğulamışdır. Səfir sərgi və konfransın keçirilməsinin məhz Azərbaycanın adı ilə bağlı olduğunu diqqətə çatdırmış, bunu ölkəmizin dünyada artan nüfuzu ilə əlaqələndirmişdir.
Ölkələrimiz arasında münasibətlərə toxunan K.Braun Böyük Britaniyanın Azərbaycan ilə əməkdaşlığa böyük əhəmiyyət verdiyini vurğulamışdır. Diplomat Böyük Britaniyanın Azərbaycana ən çox sərmayə yatıran ölkə olduğunu xatırlatmışdır.
ABŞ Dövlət Departamentinin Avrasiya enerji məsələləri üzrə xüsusi elçisi Riçard Morninqstar tədbirin yüksək səviyyədə təşkil olunduğunu demişdir. On beş ildir Azərbaycana mütəmadi olaraq səfər etdiyini deyən R.Morninqstar hər dəfə ölkəmizdə müşahidə etdiyi dinamik inkişafın onu valeh etdiyini nəzərə çarpdırmışdır.
ABŞ ilə Azərbaycan arasında strateji əlaqələrin böyük əhəmiyyətini qeyd edən R.Morninqstar bu münasibətlərin təkcə enerji sahəsi ilə məhdudlaşmadığını diqqətə çatdırmışdır.
Rəsmi qəbulda Azərbaycanın dövlət və hökumət rəsmiləri, Milli Məclisin deputatları, xarici ölkələrin Bakıdakı səfirləri, ictimaiyyət nümayəndələri iştirak etmişlər.
AzərTAc{nl}