Azərbaycan Respublikasının Prezidenti İlham Əliyev fevralın 7-də İndoneziya Respublikasının ölkəmizdəki fövqəladə və səlahiyyətli səfiri Raden Prayono Atiyantonun etimadnaməsini qəbul etmişdir.
Səfir Raden Prayono Atiyanto fəxri qarovul dəstəsinin qarşısından keçdi.
Raden Prayono Atiyanto etimadnaməsini Prezident İlham Əliyevə təqdim etdi.
Sonra Azərbaycan Prezidenti İlham Əliyev səfirlə söhbət etdi.
Azərbaycan Respublikası ilə İndoneziya Respublikası arasında siyasi əlaqələrin uğurla inkişaf etdiyini vurğulayan dövlətimizin başçısı ölkələrimizin beynəlxalq təşkilatlarda bir-birilərinə daim qarşılıqlı dəstək vermələrinin önəmini qeyd etdi. Azərbaycanın İndoneziyada bir neçə il bundan əvvəl səfirliyinin fəaliyyətə başladığını vurğulayan Prezident İlham Əliyev İndoneziyanın ölkəmizdə səfirliyinin açılmasını əməkdaşlığımızın daha da genişləndirilməsi işinə xidmət edəcəyini dedi. Dövlətimizin başçısı Azərbaycan ilə İndoneziya arasında əlaqələrin iqtisadi, investisiya qoyuluşu, birgə layihələr və ticarət sahələrində inkişaf etdirilməsi üçün yaxşı imkanların olduğunu dedi. Raden Prayono Atiyantonun İndoneziyanın ilk səfiri kimi Azərbaycanda diplomatik fəaliyyətə başlamasının önəmini qeyd edən Prezident İlham Əliyev ona uğurlar arzuladı.
Səfir Raden Prayono Atiyanto İndoneziya Respublikasının Prezidenti Susilo Bambanq Yudhoyononun salamlarını dövlətimizin başçısına çatdırdı. O, ölkəsinin Azərbaycan ilə dostluğu və əməkdaşlığı genişləndirməyə maraqlı olduğunu dedi. Ölkələrimiz arasında siyasi əlaqələrin səviyyəsinin razılıq doğurduğunu vurğulayan diplomat iqtisadi sahədə əməkdaşlığın inkişaf etdirilməsi üçün İndoneziya Prezidentindən xüsusi tapşırıq aldığını dedi.
Dövlətimizin başçısı Prezident Susilo Bambanq Yudhoyononun salamlarına görə minnətdarlığını bildirdi, onun da salamlarını İndoneziya dövlətinin başçısına çatdırmağı xahiş etdi.

AzərTAc