Dünən Xətai rayonundakı Heydər Əliyev adına Liseydə Dünya Azərbaycanlılarının Həmrəylik Günü və Yeni il münasibətilə keçirilən tədbirə rayon icra hakimiyyətinin başçısı Razim Məmmədov və Milli Məclisin deputatı, YAP Xətai rayon təşkilatının sədri Hüseynbala Mirələmov da qatılmışdılar.
Liseyin şagirdlərinin hazırladığı bayram proqramında əvvəlcə ümummilli lider Heydər Əliyevin azərbaycançılıq fəlsəfəsindən, bu fəlsəfənin müstəqil dövlətimizin inkişafında mühüm əhəmiyyət kəsb etməsindən danışıldı, müxtəlif tarixi faktlar xatırlandı və gənc nəslin bu ruhda tərbiyə olunmasında müəllim kollektivinin əməyindən bəhs olundu. Şagirdlər ulu öndərin "hər bir azərbaycanlı gənc öz həyat yolunu müstəqil Azərbaycan Respublikasının gələcək yolu kimi qəbul etməlidir" tövsiyəsinin onların həyat amalına çevrildiyini bildirərək buna yalnız yüksək nailiyyətlərlə nail olmağın mümkünlüyünü də unutmadıqlarını söylədilər.
Sonra Xətai Rayon İcra Hakimiyyətinin başçısı Razim Məmmədov liseyin şagirdlərinin simasında bütün rayon uşaqlarını həmrəylik günü və yeni təqvim ili münasibətilə təbrik etdi. Natiq ölkənin son 8 ildə qazandığı uğurlara diqqət çəkərək bildirdi ki, bu bir daha ulu öndər Heydər Əliyev yolunun inkişaf və tərəqqi yolu olduğunu təsdiq edir. Siz gənclər, uşaqlar bu uğurlu yolun davamçıları, müstəqilliyimizin əbədiliyinin keşikçilərisiniz.
Millət vəkili Hüseynbala Mirələmov isə ulu öndər Heydər Əliyevin uşaqlara sonsuz məhəbbətindən, Azərbaycan gəncliyinə sonsuz etimadından bəhs edərək bildirdi ki, bu etimadı doğrultmağın əsas yolu sizin bu gün təhsildə və elmdə qazanacağınız uğurlar ola bilər. Sizə yeni ildə bu işdə və həyatda yeni-yeni uğurlar arzulayıram.
Sonra şagirdlərin hazırladığı bayram konserti başlandı.{nl}

İ.RÜSTƏMOV, R.SALMANOV (foto), "Xalq qəzeti"