Azərbaycan Respublikasının Baş naziri Artur Rasizadə dekabrın 29-da ölkəmizdə səfərdə olan Seynt-Vinsent və Qrenadin adalarının Baş naziri Ralf Qonzalves ilə görüşmüşdür.
Azərbaycanın Baş naziri Ralf Qonzalvesin səfərinin ölkələrimizin əlaqələrinin inkişafına yeni təkan verəcəyinə əminliyini ifadə etdi. Artur Rasizadə bildirdi ki, Azərbaycan böyüklüyündən kiçikliyindən asılı olmayaraq bütün ölkələrlə uğurlu əməkdaşlıq qurmağın tərəfdarıdır. O, Birləşmiş Millətlər Təşkilatının Təhlükəsizlik Şurasına üzv seçilməsində Azərbaycana verdiyi dəstəyə görə Seynt-Vinsent və Qrenadin adalarının Baş nazirinə təşəkkürünü bildirdi. Qeyd edildi ki, mövcud iqtisadi əlaqələri genişləndirmək üçün Azərbaycanın nümayəndə heyətinin gələn ilin fevralında Qrenadinə səfəri planlaşdırılmışdır.
Azərbaycanın Baş naziri Ermənistan-Azərbaycan, Dağlıq Qarabağ münaqişəsi barədə qonağa məlumat verdi. O bildirdi ki, Ermənistanın Azərbaycana təcavüzü nəticəsində ərazilərimizin 20 faizi işğal olunub, 1 milyondan çox azərbaycanlı doğma el-obasından didərgin düşüb. Azərbaycan tərəfi münaqişənin ölkənin ərazi bütövlüyü çərçivəsində sülh yolu ilə həllinin tərəfdarıdır.
Baş nazir Ralf Qonsalveş ölkəsinin Azərbaycan ilə iqtisadi sahədə əlaqələrin inkişafında maraqlı, investisiyalara açıq olduğunu diqqətə çatdırdı.
Azərbaycanın ərazi bütövlüyünü dəstəklədiyini deyən Seynt-Vinsent və Qrenadin adalarının Baş naziri bu məsələ barədə öz ölkəsində, həmçinin BMT çərçivəsində məlumat verəcəyini qeyd etdi.