Azərbaycan Prezidentinin mətbuat katibi Azər Qasımov MDB ölkələri dövlət başçılarının qeyri-formal sammitində Azərbaycan Prezidenti İlham Əliyevin iştirakı barədə sualı Day.az internet portalına müsahibəsində şərh etmişdir. AzərTAc həmin şərhin mətnini oxuculara təqdim edir.
- Azər müəllim, 9 May - Qələbə günü münasibətilə Azərbaycan Respublikasının Prezidenti İlham Əliyevin Moskvaya səfəri və dövlətimizin başçısının bayram tədbirlərində iştirakı nəzərdə tutulurmu?
- Azərbaycan Prezidenti İlham Əliyev Rusiya Prezidenti Dmitri Medvedevin dəvəti ilə Moskvaya səfər edəcək və mayın 9-da Böyük Vətən müharibəsində Qələbənin 65 illiyinə həsr edilmiş bayram tədbirlərində iştirak edəcəkdir.
- MDB ölkələri dövlət başçılarının mayın 8-də Moskvada keçiriləcək qeyri-rəsmi sammitində Azərbaycan Prezidenti iştirak edəcəkmi?
- 8 may erməni silahlı qüvvələri tərəfindən Azərbaycanın qədim Şuşa şəhərinin işğal edildiyi gündür. Azərbaycan xalqı üçün bu faciəli gündə işğalçı ölkənin prezidenti S.Sarkisyan ilə hər hansı tədbirdə birgə iştirak etmək Azərbaycan tərəfi üçün qeyri-məqbuldur.
AzərTAc