Hörmətli cənab Prezident!

Güclü qasırğa nəticəsində Xəzər dənizinin “Günəşli” yatağında baş vermiş faciə ilə əlaqədar Serbiya Respublikasının vətəndaşları adından və şəxsən öz adımdan Sizə dərin hüznlə başsağlığı verirəm.

Həlak olanların  doğmalarının və yaxınlarının kədərini bölüşür, xəsarət alanlara tezliklə sağalmalarını arzu edirik.

Zati-aliləri, xahiş edirəm yüksək ehtiramımı qəbul edəsiniz.

Hörmətlə,

Tomislav NİKOLİÇ
Serbiya Respublikasının Prezidenti

Azərbaycan Respublikasının Prezidenti zati-aliləri cənab İlham Əliyevə

Zati-aliləri!

Azərbaycanın “Günəşli” neft yatağındakı platformada yanğın nəticəsində insanların həlak olması ilə bağlı xəbər məni çox kədərləndirdi.

Bütün Litva xalqının adından və şəxsən öz adımdan həlak olanların ailə üzvlərinə, yaxınlarına və bütün Azərbaycan xalqına dərin hüznlə başsağlığı verirəm.

İtkin düşənlərin sağ-salamat tapılmasını, xəsarət alanların tezliklə sağalmasını, dəhşətli qəzanın nəticələrinin tezliklə aradan qaldırılmasını arzu edirəm.

Hörmətlə,

Dalya QRİBAUSKAYTE
Litva Respublikasının Prezidenti

Azərbaycan Respublikasının Prezidenti zati-aliləri cənab İlham Əliyevə

Zati-aliləri!

Xəzər dənizinin “Günəşli” neft yatağındakı platformada baş vermiş güclü yanğın nəticəsində insan itkisi və xəsarət alanlar haqqında xəbər məni dərindən kədərləndirdi.

Bu ağır anlarda Moldova Respublikasının xalqı adından və şəxsən öz adımdan həlak olanların ailələrinə dərin hüznlə başsağlığı verir, xəsarət alanların tezliklə sağalmasını arzu edirəm.    

Hörmətlə,

Nikolaye TİMOFTİ
Moldova Respublikasının Prezidenti

Azərbaycan Respublikasının Prezidenti zati-aliləri cənab İlham Əliyevə

Hörmətli cənab Prezident!

“Günəşli” neft yatağında ötən cümə günü baş vermiş və insanların həlak olması ilə nəticələnmiş qəza barədə aldığım xəbər məni dərindən sarsıtdı. Avropa İttifaqı adından həlak olanların ailə üzvlərinə və yaxınlarına dərin hüznlə başsağlığı verir, itkin düşənlərin aqibəti  ilə bağlı narahatlığımı bildirir, xəsarət alanların tezliklə sağalmasını arzu edirəm.

Zati-aliləri, xahiş edirəm ən dərin ehtiramımı qəbul edəsiniz.

Hörmətlə,

Federika MOQERİNİ
Avropa İttifaqının ali nümayəndəsi,
Avropa Komissiyasının vitse-prezidenti

Azərbaycan Respublikasının Prezidenti zati-aliləri cənab İlham Əliyevə

Hörmətli İlham Heydər oğlu!

“Günəşli” neft yatağındakı platformada yanğın nəticəsində insanların həlak olması ilə əlaqədar Sizə dərin hüznlə başsağlığı verirəm. Bu faciə ilə bağlı Sizin kədərinizə şərik olduğumu bildirir, həlak olanların ailələrinə və yaxınlarına səbir diləyir, xəsarət alanların hamısının tezliklə sağalmasını arzu edirəm.

Hörmətlə,

Mixail QUTSERİYEV
“Russneft Neft Şirkəti”  ASC-nin
direktorlar şurasının sədri

Azərbaycan Respublikasının Prezidenti zati-aliləri cənab İlham Əliyevə

Zati-aliləri, cənab Prezident!

Dekabrın 4-də Xəzər dənizinin “Günəşli” yatağındakı neft platformasında baş verən və ölkənizi matəmə qərq edən güclü yanğın nəticəsində insanların həyatını itirməsi Azərbaycanın Dostları Assosiasiyasının bütün üzvlərini və şəxsən məni çox kədərləndirdi.

Zati-aliləri, bu ağır günlərdə Sizinlə birgə olduğumuzu bildirir, həlak olanların ailələrinə başsağlığı verir və Sizə ən dərin hörmət hisslərimi ifadə edirəm.

Jan-Fransua MANSEL
Parisdə Azərbaycanın
Dostları Assosiasiyasının prezidenti