Hörmətli cənab Prezident!

Ölkənizin milli bayramı – Respublika Günü münasibətilə Sizə və xalqınıza öz adımdan və Azərbaycan xalqı adından ən səmimi təbriklərimizi yetirirəm.

Azərbaycan-İtaliya münasibətlərinin hazırkı səviyyəsi məmnunluq doğurur. Daim genişlənən siyasi, iqtisadi və mədəni əlaqələrimiz ölkələrimiz və xalqlarımız arasında dostluq və əməkdaşlıq münasibətlərinin daha da möhkəmlənməsinə öz töhfəsini verməkdədir.

İnanıram ki, ikitərəfli qaydada, həmçinin Avropa İttifaqı çərçivəsində əməkdaşlığımızı müvəffəqiyyətlə davam etdirmək üçün bundan sonra da birgə səylər göstərəcəyik.

Bu əlamətdar gündə Sizə möhkəm cansağlığı, işlərinizdə uğurlar, dost İtaliya xalqına daim sülh və tərəqqi arzulayıram.

Hörmətlə,

İlham ƏLİYEV

Azərbaycan Respublikasının Prezidenti

Bakı, 24 may 2013-cü il

Azərbaycan Respublikasının Prezidenti zati-aliləri

cənab İlham Əliyevə

Zati-aliləri!

Azərbaycanın milli bayramı – Respublika Günü münasibətilə Sizə və Azərbaycan xalqına səmimi salamlarımı və təbriklərimi çatdırıram. İndoneziya xalqı da mənim təbriklərimə qoşulur.

İcazə verin, bu əlamətdar bayramın yaratdığı fürsətdən istifadə edərək bir daha bildirim ki, İndoneziya xalqlarımızın mənafeyi naminə ölkələrimiz arasında mövcud olan yaxın və səmimi münasibətlərin gələcəkdə də gücləndirilməsinə hazırdır.

 Azərbaycan Respublikasına davamlı sülh və rifah arzulayıram.

Zati-aliləri, ən dərin ehtiramımı qəbul edin.

Susilo Bambanq YUDHOYONO

İndoneziya Respublikasının Prezidenti

Azərbaycan Respublikasının Prezidenti zati-aliləri

cənab İlham Əliyevə

Zati-aliləri!

Ölkənizin dövlət bayramı – Respublika Günü münasibətilə təbriklərimi qəbul edin. Sizə və Azərbaycan vətəndaşlarına ölkənizin rifahı və bütün Cənubi Qafqaz regionunda təhlükəsizlik naminə bol-bol uğurlar arzulayıram.

Eyni zamanda, arzu edirəm ki, Slovakiya ilə Azərbaycan Respublikası arasında ənənəvi səmimi qarşılıqlı münasibətlər gələcəkdə konkret əməkdaşlıq layihələrində əks olunsun.

Zati-aliləri, Sizə dərin ehtiramımı bildirmək istəyirəm.

Hörmətlə,

İvan QAŞPAROVİÇ

Slovakiya Respublikasının Prezidenti

Azərbaycan Respublikasının Prezidenti zati-aliləri

cənab İlham Əliyevə

Zati-aliləri!

Azərbaycanın milli bayramı – Respublika Günü münasibətilə Zati-alinizə ən səmimi təbriklərimi çatdırır, Sizə cansağlığı, Azərbaycan xalqına isə xoşbəxt gələcək arzulayıram.

ANRİ

Lüksemburqun Böyük Hersoqu

Azərbaycan Respublikasının Prezidenti zati-aliləri

cənab İlham Əliyevə

Zati-aliləri!

Dost ölkənizin milli bayramı – Respublika Günü münasibətilə səmimi təbriklərimi Sizə bildirməkdən sevinc hissi duyuram. Bu fürsətdən istifadə edərək dost ölkələrimiz və xalqlarımız arasında davamlı əlaqələrin inkişafını, zati-alinizə möhkəm cansağlığı və səadət, ölkənizə və xalqınıza tərəqqi və çiçəklənmə arzuladığımızı bildiririk.

Möhtərəm Prezident, səmimi salamlarımı və xoş arzularımı qəbul edin.

Hörmətlə,

Sabah əl-Əhməd əl-Cabir əs-SABAH

Küveyt Dövlətinin Əmiri

Azərbaycan Respublikasının Prezidenti zati-aliləri

cənab İlham Əliyevə

Cənab Prezident!

Zati-alinizi Azərbaycanın milli bayramı – Respublika Günü münasibətilə təbrik edirəm.

Sizə və dost xalqınıza möhkəm cansağlığı, tərəqqi və çiçəklənmə arzu edirəm.

Böyük hörmət və ehtiramla,

Məhəmməd MURSİ

Misir Ərəb Respublikasının Prezidenti

Azərbaycan Respublikasının Prezidenti zati-aliləri

cənab İlham Əliyevə

Hörmətli Prezident!

Azərbaycan Respublikasının milli bayramı münasibətilə zati-alinizə səmimi təbriklərimi çatdırmaqdan böyük məmnunluq hissi duyuram. Sizə möhkəm cansağlığı və xoşbəxtlik, qardaş Azərbaycan xalqına isə davamlı tərəqqi və çiçəklənmə arzulayıram.

Dost ölkələrimizin mənafeyi naminə ikitərəfli əlaqələrimizin gücləndirilməsi və bütün sahələrdə qarşılıqlı mübadilənin genişləndirilməsi istiqamətində Sizinlə daha yaxından işləməyə ümid edirəm.

Zati-aliləri, xahiş edirəm Sizə möhkəm cansağlığı və uğurlar arzularımı qəbul edin.

Monsef MARZUKİ

Tunis Respublikasının Prezidenti

Azərbaycan Respublikasının Prezidenti zati-aliləri

cənab İlham Əliyevə

Zati-aliləri!

Azərbaycan Respublikasının milli bayramı münasibətilə zati-alinizə səmimi təbriklərimi çatdırır, Sizə cansağlığı və xoşbəxtlik, Azərbaycan xalqına isə tərəqqi və çiçəklənmə arzulayıram.

Ram Baran YADAV

Nepalın Prezidenti