Zati-aliləri!
Azərbaycanın milli bayramı - Respublika Günü münasibətilə Sizə ən səmimi təbriklərimi, cansağlığı, səadət, dost Azərbaycan xalqına isə tərəqqi və firavanlıq arzularımı bildirmək mənə xoşdur.
Fürsətdən istifadə edib Zati-alilərinizə bildirmək istərdim ki, yeni Tunis bizim qardaş xalqlarımız arasında dostluq münasibətlərinin möhkəmlənməsi naminə bundan sonra da əməkdaşlıq etmək əzmindədir.
Monsef MARZUKİ Tunis Respublikasının Prezidenti

Zati-aliləri!
Livan xalqı adından və şəxsən öz adımdan ölkənizin milli bayramı - Respublika Günü münasibətilə zati-alinizə səmimi təbriklərimi çatdırır, Sizə xoşbəxtlik və uğurlar, Azərbaycan xalqına isə firavanlıq arzulayıram.
General Mişel SÜLEYMAN Livan Respublikasının Prezidenti

Cənab Prezident!
Azərbaycanın milli bayramı - Respublika Günü münasibətilə Kamboca xalqı adından və şəxsən öz adımdan zati-alinizi, Sizin şəxsinizdə hökumətinizi və Azərbaycan xalqını səmimi qəlbdən təbrik etməkdən böyük məmnunluq hissi duyuram.
Fürsətdən istifadə edərək, Sizə möhkəm cansağlığı və xoşbəxtlik, Azərbaycan xalqına davamlı tərəqqi və rifah arzu edirəm.
Əminəm ki, ölkələrimiz arasında mövcud olan dostluq əlaqələri bundan sonra da möhkəmlənəcəkdir.
Norodom SİAMONİ Kambocanın Kralı

Hörmətli Prezident!
Böyük məmnuniyyətlə zati-alinizə Peru hökuməti və xalqı adından, həmçinin şəxsən öz adımdan Azərbaycanın milli bayramı - Respublika Günü münasibətilə ürəkdən təbriklərimi çatdırıram.
Sizin alicənab xalqınıza tərəqqi və rifah arzulayaraq, fürsətdən istifadə edib ölkələrimiz arasında müvəffəqiyyətlə inkişaf edən dostluq və əməkdaşlıq əlaqələrinin möhkəmləndirilməsinə mənim hökumətimin rəğbət bəslədiyini ifadə etmək istərdim.
Belə bir xoş münasibətlə zati-alinizə olan ən yüksək hörmət və ehtiramımı bir daha təsdiq edirəm.
Olyanta Moyses UMALA TASSO Peru Respublikasının Prezidenti

Zati-aliləri!
Azərbaycanın milli bayramı - Respublika Günü münasibətilə Şimali Kipr Türk Respublikasının xalqı adından və öz adımdan Sizə ən səmimi təbriklərimi çatdırır, Azərbaycan xalqına sülh, əmin-amanıq və tərəqqi arzulayıram.
Dərviş ƏROĞLU Şimali Kipr Türk Respublikasının Prezidenti

Zati-aliləri!
İcazə verin, Sizi və xalqınızı Azərbaycanın milli bayramı - Respublikası Günü münasibətilə ürəkdən təbrik edim.
Fürsətdən istifadə edib əmin olduğumu bildirirəm ki, ölkələrimiz arasında dostluq və əməkdaşlıq münasibətləri hər iki xalqlarımızın istəklərinə uyğun olaraq möhkəmlənəcək və inkişaf edəcəkdir. Sizə ölkənizin inkişafı və firavanlığı naminə fəaliyyətinizdə böyük uğurlar arzulayıram.
Hörmətlə,
Kim EN NAM Koreya Xalq Demokratik Respublikası Ali Xalq Məclisi Rəyasət Heyətinin sədri

Zati-aliləri!
Qardaş Azərbaycanın milli bayramı - Respublika Günü münasibətilə Fələstin xalqı adından və şəxsən öz adımdan Sizə, dəyərli hökumətinizə və qardaş Azərbaycan xalqına ən səmimi təbriklərimi və xoş arzularımı çatdırmaqdan böyük məmnunluq hissi duyuram.
İşğala son qoyulması və paytaxtı Şərqi Yerusəlim olmaqla müstəqil Fələstin dövlətinin yaradılması məsələsində xalqımızın haqq işində və mübarizəsində dostcasına nümayiş etdirdiyiniz qətiyyətli dəstəyi, həmrəylik mövqeyini yüksək qiymətləndiririk.
Sizə möhkəm cansağlığı və xoşbəxtlik, qardaş xalqınıza və ölkənizə davamlı tərəqqi və rifah arzulayıram.
Mahmud ABBAS Fələstin Dövlətinin Prezidenti, Fələstin Azadlıq Təşkilatı İcraiyyə Komitəsinin sədri, Fələstin Milli Administrasiyasının prezidenti

Əs-səlamu əleykum və rəhmətullahi və bərəkatuhu.
Ölkənizin milli bayramı münasibətilə zati-alilərinizə ən səmimi təbriklərimi çatdırıram. Sizə cansağlığı və xoşbəxtlik, qardaş Azərbaycan xalqına daha böyük inkişaf və çiçəklənmə arzu edirəm.
Zati-alilərinizə hörmət və ehtiramla,
Qardaşınız,
Vəliəhd Nayif bin Əbdüləziz Al Səud Səudiyyə Ərəbistanı Krallığı Baş nazirinin müavini, daxili işlər naziri

Zati-aliləri!
Ölkənizin milli bayramı - Respublika Günü münasibətilə zati-alinizə ən səmimi təbriklərimi çatdırıram.
Sizə cansağlığı, əmin-amanlıq və qardaş Azərbaycan xalqına davamlı inkişaf və rifah arzu edirəm.
Ən yüksək ehtiramla,
Həməd bin Casim bin Cabir AL TANİ Qətər Dövlətinin Baş naziri və xarici işlər naziri

Zati-aliləri!
Ölkənizin milli bayramı - Respublika Günü münasibətilə Sizə səmimi salamlarımı və təbriklərimi çatdırıram. Şəxsi həyatınızda, eləcə də qardaş Azərbaycan xalqının inkişafı və tərəqqisi naminə həyata keçirdiyiniz işlərdə Sizə uğurlar arzulayıram.
Ən yüksək ehtiramla,
Təmim bin Həməd AL TANİ Qətər Dövlətinin Vəliəhdi

Hörmətli İlham Heydər oğlu!
Sizi Azərbaycanın milli bayramı - Respublika Günü münasibətilə ürəkdən təbrik edirəm.
Azərbaycan sizin atanız Heydər Əliyevin rəhbərliyi ilə mürəkkəb və şanlı inkişaf yolu keçmişdir.
Bu gün Sizin öz dövlətinizin mənafelərinə şəxsi sadiqliyiniz, fəal həyat mövqeyiniz öz xalqına sədaqətlə xidmət etməyin parlaq nümunəsidir.
Siz özünüzün bütün qüvvə, təcrübə və biliyinizi Azərbaycan Respublikasının rifahı naminə sərf edir, planları bacarıqla real işlərə çevirirsiniz. Sizin yüksək peşəkarlığınız, məqsədyönlü işiniz respublikanın sosial-iqtisadi inkişafına, onun sakinlərinin həyat səviyyəsinin və rifahının yüksəldilməsinə çox kömək edir.
Sizə səmimi qəlbdən möhkəm cansağlığı, səadət, firavanlıq, ölkənizin rifahı naminə bütün işlərinizdə və təşəbbüslərinizdə yeni uğurlar arzulayıram.
Hörmətlə,
Yunusbek YEVKUROV İnquşetiya Respublikasının başçısı

Hörmətli İlham Heydər oğlu!
Azərbaycanın milli bayramı - Respublika Günü münasibətilə Sizi Dağıstan Respublikasının Xalq Məclisi adından və şəxsən öz adımdan təbrik edirəm.
Son illərdə Azərbaycan sosial-iqtisadi inkişafda və siyasi sabitliyin qorunub saxlanmasında böyük uğurlar qazanmışdır. Əhalinin həyat səviyyəsi əhəmiyyətli dərəcədə yüksəlir. Dağıstanlılar Sizin yaxın qonşularınız olaraq, Rusiya ilə Azərbaycan arasında tarixən yaranmış mehriban qonşuluq münasibətlərinə, xalqlarımız arasında qardaşcasına dostluğun möhkəmlənməsinə və inkişafına verdiyiniz töhfəni xüsusi qiymətləndirirlər.
Sizə möhkəm cansağlığı və səadət, ölkənizin çoxmillətli xalqına sülh və firavanlıq arzulayıram.
Maqomed-Sultan MAQOMEDOV Dağıstan Respublikası Xalq Məclisinin sədri