Azərbaycan Respublikasının Prezidenti zati-aliləri cənab İlham Əliyevə

Cənab Prezident!
Azərbaycan Respublikasının milli bayramı - Respublika Günü münasibətilə Azərbaycan xalqına ən xoş arzularla sülh və rifah, şəxsən Sizə isə möhkəm cansağlığı, fəaliyyətinizdə böyük müvəffəqiyyətlər diləməkdən məmnunam.
Xüsusi razılıqla qeyd edirəm ki, ötən il əldə olunan və ikitərəfli münasibətlərimizin daha yüksək səviyyəyə qaldırılmasına imkan yaradan, strateji tərəfdaşlıq haqqında razılaşma əməkdaşlığımızın bütün sahələrdə yüksələn xətlə inkişafına şərait yaratdı. Enerji sektorunda qurulmuş işbirliyi qarşılıqlı əlaqələrimizin mükəmməlliyini nümayiş etdirir. Müzakirə etdiyimiz layihələrin konkretləşdirilməsi Azərbaycan Respublikasının Rumıniyanın və Avropanın enerji təhlükəsizliyində strateji əhəmiyyətinə olan inamımı ancaq gücləndirə bilər.
Sizi əmin etmək istəyirəm ki, Rumıniya Azərbaycan Respublikasının daimi tərəfdaşı olaraq qalır və bu, qarşımıza Azərbaycan Respublikası ilə Avropa və Avratlantika strukturları arasında daha sıx əlaqələr üçün yeni imkanları müəyyən etmək vəzifəsini qoyur.
Eyni zamanda, bütövlükdə Qara dəniz regionunda mövcud olan, o cümlədən Dağlıq Qarabağ kimi uzun müddət həllini gözləyən münaqişələrin dinc yolla nizamlanması prosesində suverenlik, müstəqillik, ərazi bütövlüyü və sərhədlərin toxunulmazlığı kimi prinsiplərə Rumıniyanın sadiqliyinə əmin ola bilərsiniz.
Cənab Prezident, bir daha Azərbaycan Respublikasının milli bayramı - Respublika Günü münasibətilə təbriklərimi çatdırır, ən yüksək hörmət və ehtiramımı qəbul etməyinizi xahiş edirəm.
Trayan BESESKU Rumıniyanın Prezidenti

***

Zati-aliləri!
Azərbaycanın Respublika Gününün qeyd olunması münasibətilə İndoneziya Respublikasının hökuməti və xalqı adından ən səmimi təbriklərimi çatdırmaqdan məmnunam.
Fürsətdən istifadə edərək İndoneziya və Azərbaycan arasında dostluq əlaqələrinin xalqlarımızın qarşılıqlı mənafeyi və tərəqqisi naminə inkişaf etdiriləcəyinə ümidvar olduğumu bir daha qeyd etmək istəyirəm.
Susilo Bambanq YUDHOYONO İndoneziya Respublikasının Prezidenti

***

Hörmətli Prezident!
Milli bayramınız münasibətilə zati-alinizə ən səmimi təbriklərimi və ən xoş arzularımı çatdırıram, İrlandiya xalqı da bu təbriklərimə qoşulur.
Fürsətdən istifadə edərək Azərbaycan xalqına xoşbəxtlik və tərəqqi arzulayıram.
xanım Meri MAKALİS İrlandiyanın Prezidenti

***

Zati-aliləri!
Sizə və xalqınıza Azərbaycanın Respublika Günü - 28 May münasibətilə Sinqapur xalqı adından səmimi təbrikləri çatdırmaqdan şərəf duyuram.
Zati-aliləri, xahiş edirəm, Azərbaycan Respublikasına davamlı sülh, inkişaf və rifah ilə bağlı ən səmimi arzularımızı qəbul edin.
Sellapan Rama NATAN Sinqapur Respublikasının Prezidenti