Azərbaycan Respublikasının Prezidenti zati-aliləri cənab İlham Əliyevə

Cənab Prezident!
Azərbaycan Respublikasının milli bayramı münasibətilə İspaniya hökuməti və xalqı adından, həmçinin öz adımdan ən səmimi təbriklərimi çatdırmaq istərdim.
Cənab Prezident, Sizə cansağlığı, Azərbaycan xalqına sülh və rifah arzu edirəm.
Dərin hörmətlə,
Xuan KARLOS İspaniyanın Kralı

***

Zati-aliləri!
Respublika Günü münasibətilə Sizə və hökumətinizə ən səmimi təbriklərimi və ən xoş arzularımı çatdırmaqdan olduqca məmnunam.
Ölkələrimiz arasında dostluq münasibətlərindən razılıq duyur, həmin münasibətləri həm ikitərəfli, həm beynəlxalq səviyyədə möhkəmləndirmək məqsədi ilə Sizinlə işimizin davam etdirilməsini səmimiyyətlə arzulayıram.
Ən xoş arzularla,
Hacı Həssənal BOLKİAH Bruneyin Sultanı

***

Hörmətli İlham Heydər oğlu, əziz həmkar!
Azərbaycan Respublikasının milli bayramı münasibətilə Sizə və Azərbaycan xalqına səmimi təbriklərimi çatdırmaqdan məmnunam.
Şadam ki, ölkələrimiz arasında çox sıx əməkdaşlıq davam edir. İnanıram ki, münasibətlərimiz gələn illər ərzində həm ikitərəfli, həm çoxtərəfli səviyyədə daha da dərinləşəcəkdir.
Azərbaycan Respublikasına və onun xalqına rifah və tərəqqi arzulayır, Sizə olan ən yüksək ehtiramımı qəbul etməyinizi xahiş edirəm.
Sizin dostunuz,
Toomas Hendrik İLVES Estoniya Respublikasının Prezidenti

***

Zati-aliləri!
Azərbaycan Respublikasının milli bayramının doğurduğu xoş münasibətlə zati-alinizə və Azərbaycan xalqına çatdırdığım ən səmimi arzularıma xanımım da qoşulur.
Azərbaycan xalqını daha böyük sülhə, tərəqqiyə və firavanlığa aparmaq yolunda gördüyünüz işlərin davam etdirilməsi üçün zati-alinizə möhkəm cansağlığı və səadət diləyirəm.
Tuanku Mizan Zeynal Abidin ibni əl-Mərhum Sultan Mahmud əl-Müktəfi Billah Şah, Malayziyanın Ali Başçısı

***

Zati-aliləri!
Azərbaycan Respublikasının milli bayramı münasibətilə Makedoniya Respublikası adından və öz adımdan Sizə və ölkənizin xalqına ən xoş arzularla rifah və əmin-amanlıq diləyir, ən səmimi təbrikləri çatdırmaqdan xüsusi şərəf duyuram.
Zati-aliləri, bu rəsmi fürsətdən istifadə edərək, tam əmin olduğumu bildirirəm ki, biz birgə səylərlə həm ikitərəfli, həm çoxtərəfli səviyyədə ümumi maraq doğuran bütün sahələrdə Makedoniya Respublikası ilə Azərbaycan Respublikası arasında dostluq münasibətlərinin və əməkdaşlığın daha da inkişaf etməsinə töhfə verə bilərik.
Zati-aliləri, Sizə cansağlığı və işlərinizdə uğurlar diləyir, ən səmimi təbrikləri çatdırır, ən yüksək hörmət və ehtiramımı qəbul etməyinizi xahiş edirəm.
Gyorge İVANOV Makedoniya Respublikasının Prezidenti