Azərbaycan diasporunun Almaniyadakı Mərkəzi Şurasının rəhbəri, həmyerlimiz Tengis Sade Baron zu Romkerhall Ukraynaya səfəri çərçivəsində Kiyev şəhərində fəaliyyət göstərən Ukrayna Azərbaycanlıları Konqresinin idarə heyətinin rəhbəri Xəqani Hüseynovla, mədəniyyət departamentinin rəhbəri Qurban Abbasovla və Ukrayna diaspor təşkilatının rəhbəri Hikmət Cavadovla görüşmüşdür.

Görüşdə Xocalı soyqırımının 21-ci ildönümü ilə əlaqədar ABŞ Prezidenti Barak Obamaya və BMT-nin baş katibi Pan Gi Muna müraciət qəbul olunmuşdur.

Müraciətdə bildirilir ki, beynəlxalq təşkilatlar Xocalı faciəsini soyqırımı kimi tanımalı, ikili standartlara yol vermədən Ermənistan-Azərbaycan, Dağlıq Qarabağ münaqişəsinin beynəlxalq hüququn norma və prinsiplərinə uyğun olaraq həllinə yönəlmiş səyləri daha da artırmalı, Ermənistan dövlətinə qarşı sanksiyalar tətbiq edilməlidir.

Qeyd edilir ki, işğalçı Ermənistan dövləti ərazi iddialarından əl çəkərək münaqişə ilə bağlı qəbul edilmiş beynəlxalq sənədlərin müddəalarını yerinə yetirməli, Azərbaycanın ərazi bütövlüyü bərpa olunmalı, azərbaycanlı əsir və girovlar azad edilməli, pozulmuş hüquqları bərpa edilməklə qaçqın və məcburi köçkünlər doğma yurdlarına qayıtmalıdırlar.

Müraciəti Ukrayna diaspor təşkilatının rəhbəri Hikmət Cavadov, Mədəniyyət Departamentinin rəhbəri Qurban Abbasov, Almaniyadakı Azərbaycanlıların Koordinasiya Mərkəzinin rəhbəri Samirə İsmayılova-Patser, Ukrayna Azərbaycanlıları Konqresinin idarə heyətinin rəhbəri Xəqani Hüseynov və Azərbaycan diasporunun Almaniyadakı Mərkəzi Şurasının rəhbəri Tengis Sade Baron zu Romkerhall imzalamışlar.

Vüqar SEYİDOV
AzərTAc-ın xüsusi müxbiri
Berlin