Bakı-Tbilisi-Qars dəmir yolu xəttinin açılması tarixi hadisədir. Bu layihə Azərbaycan, Türkiyə və Gürcüstan, eləcə də onların tərəfdaşları üçün yeni imkanlar açacaq.

Bu fikri AZƏRTAC-a məxsusi açıqlamasında Gürcüstan parlamentinin Avropaya inteqrasiya komitəsinin sədri Tamara Xulordava deyib.

T.Xulordava qeyd edib ki, bu layihə region ölkələri üçün yeni iqtisadi perspektivlər yaradacaq. “Azərbaycan, Türkiyə və Gürcüstan yerləşdikləri geostrateji mövqeyə görə Asiya ilə Avropa arasında körpü rolunu layiqincə yerinə yetirir. Düşünürəm ki, bu layihə də iqtisadiyyatın yeni inkişaf mərhələsi olacaq”, deyə Gürcüstan parlamentinin deputatı əlavə edib.

O qeyd edib ki, Bakı-Tbilisi-Qars dəmir yolu xətti dünya üçün bir sülh, təhlükəsizlik, ölkələrin bir-birindən səmərəli faydalanmaq çağırışıdır.

Gürcü deputat hesab edir ki, zaman keçdikcə Bakı-Tbilisi-Qars dəmir yolu xəttindən istifadə edən ölkələrin sayı artacaq.

Emil Hüseynli

AZƏRTAC-ın xüsusi müxbiri

Kiyev