Bakı-Tbilisi-Qars layihəsi Türk dünyasını birləşdirən bir layihədir. Bu sözləri Milli Məclisin deputatı Sahib Alıyev AZƏRTAC-a açıqlamasında deyib.

O bildirib ki, Türkiyə Respublikasının Prezidenti Rəcəb Tayyib Ərdoğan Bakı-Tbilisi-Qars dəmir yolunun açılış gününü qürur günü adlandırıb. Həqiqətən, bu günü belə adlandırmaq çox doğrudur. Bakı-Tbilisi-Qars yalnız Asiya ilə Avropanı bir-birinə yox, həm də polad qollarla Azərbaycanı Türkiyəyə, eyni zamanda, Türk dünyasını bir-birinə birləşdirir. Bakı-Tbilisi-Qars dəmir yolunun açılışında Türk dünyasının baş nazirlərinin və nazirlərinin iştirakı da təsadüfi deyil.

Deputat qeyd edib ki, Bakı-Tbilisi-Qars dəmir yolunun iqtisadi əhəmiyyəti də çox böyükdür. Bu, uzun illər davam edəcək bir layihədir. Layihə Çinlə Avropa arasında iqtisadi əlaqələri möhkəmləndirmək və yükdaşımalarını artırmaqla bərabər, həmçinin multimodal daşımaları da artıracaq. Türkmənistan dövlətinin imkanı olacaq öz qazını maye qaz halında Azərbaycana və oradan dünya bazarına daşısın. Azərbaycan və Qazaxıstanın istehsal potensialının genişləndiyini də nəzərə alsaq, bu dəmir yolu xətti heç zaman öz dəyərini itirməyəcək və yükdaşıma potensialını zaman keçdikcə daha da artıracaq.