Auditoriyaya sakitlik çökmüşdü.  Bütün  tələbələr həyəcanla imtahan suallarını nəzərdən keçirirdilər.  Hər kəs professor  Ziqlinde Hartmannın orta əsrlər alman ədəbiyyatı fənni üzrə imtahanını  uğurla başa vurmağı arzu edirdi.  Müəllim və tələbələr arasında  alman dilində olan dialoq   Bakı Slavyan Universitetinin (BSU) Germanistika İnstitutunda  oxuyan tələbələrin  dilə olan sevgi və yüksək bilikləri barədə ilk andan müsbət təəssürat yaradırdı.

Germanistika İnstitutunun direktoru, dosent Sevinc Rzayeva   bildirdi ki, institut hər zaman əcnəbi mütəxəssisləri işbirliyinə  cəlb etməklə yanaşı,  Almaniya və digər almandilli ölkələrin nüfuzlu universitetlərinin pedaqoqları ilə mütəmadi əməkdaşlıq edir.  Almaniyanın Vürtsburq Universitetinin müəllimi xanım Ziqlinde Hartmann  həmin müəllimlərdən biridir və  artıq 2007-ci ildən bəri Germanistika İnstitutunda azərbaycanlı tələbələrə dərs deyir: “ 2010-cu ildə BSU-da alman dili filologiyası və müəllimliyi ixtisası yaradılanda ilk olaraq 10 tələbə qəbul olmuşdu. Bu gün isə alman dili ixtisası üzrə 120-dən çox, alman dili ikinci xarici dil üzrə isə yüzə yaxın tələbəmiz var. 2015-ci ildə isə ölkəmizdə ilk dəfə olaraq, BSU-nun nəzdində Germanistika İnstitutunun açılışı oldu. Tələbələrimizin alman dilinə marağı böyükdür. Odur ki, Ziqlinde xanımın dərsində  böyük maraq və həvəslə iştirak edirlər. O, universitetimizin  fəxri professoru olmaqla yanaşı, həm də rektorun  xarici əlaqələr üzrə müşaviridir. Ümumiyyətlə,  əcnəbi müəllimlərin universitetimizdə dərs deməsi həm əməkdaşlıq baxımından, həm də tələbələrimizin həmin dili daha yaxşı mənimsəməsi baxımından böyük önəm daşıyır. Biz  həm də DAAD—Alman Akademik Mübadilə Xidməti  ilə mütəmadi əməkdaşlıq edirik.  Tələbələrimiz DAAD proqramı vasitəsilə imtahanlarda uğurlu nəticələr qazanaraq yayda Almaniyada keçirilən  dil kurslarına qatılırlar.  Sözsüz ki, müəllimlərimiz də tələbələrin imtahana hazırlaşıb uğur qazanmasında öz dəstəklərini göstərirlər.  ”

Söhbət zamanı onu da öyrəndik ki, Bakı Slavyan Universiteti və Almaniyanın Auqsburq Universiteti arasında  qarşılıqlı əməkdaşlıq müqaviləsi imzalanıb. Müqaviləyə əsasən hər tədris ili üçün Auqsburq Universitetinin germanistika sahəsi üzrə nümayəndələri alman dili ixtisası üzrə təhsil alan tələbələrə mühazirələr oxumaq üçün BSU-ya   dəvət olunurlar.

İnstitutun təcrübəli müəllimlərindən olan dosent  Telman Kazımov bizi imtahanın getdiyi Humbolt adına Tədris və Mədəniyyət Mərkəzi ilə  tanış etdi. Bildirdi ki, bura Almaniyanın ölkəmizdəki səfirliyi tərəfindən bütün lazımi avadanlıq və dərs vəsaitləri ilə təmin edilib və burada tələbələr üçün hər cür şərait yaradılıb. Telman Kazımov qeyd etdi  ki, Almaniyadan olan müəllimlərin BSU-da mühazirələr oxuması, tələbələrlə ünsiyyəti tədrisin keyfiyyətinə  müsbət təsir  göstərməklə yanaşı,  azərbaycanlı müəllimlərin daha da  təkmilləşməsində mühüm rol oynayır. Yeri gəlmişkən, Telman müəllim başda olmaqla, institutun fəal müəllimlərindən Sahibə İbrahimova, Sənubər Zeynalova, Səbinə Hüseynova, Murad Muradovun və başqalarının  Ziqlinde Hartmannla fəal  əməkdaşlığı  burada müsbət bir ab-hava yaradıb. Bunu imtahan bitdikdən sonra  Ziqlinde Hartmannın məni Azərbaycan dilində salamlaması zamanı da  hiss etdim.

Alman dili müəlliməsi “Uzun illərdir ki, azərbaycanlı tələbələrə dərs deyirsiz. Onların marağı və dil öyrənməyi sizi qane edirmi?” — sualına gülümsəyərək cavab verir:

– Tələbələrin alman dilinə, eləcə də Almaniyaya böyük marağı var. Artıq 2007-ci ildən Bakı Slavyan Universiteti ilə əməkdaşlıq edirəm. Mənim üçün azərbaycanlı tələbələrlə ünsiyyətdə olmaq və bu əməkdaşlıq çox xoşdur. Onlar böyük həvəslə alman dilini öyrənir, dərslərdə fəallıq göstərirlər. Çoxu daha sonra təhsilini Almaniyada davam etdirmək arzusundadır. Biz tez-tez alman ədəbiyyatının görkəmli  nümayəndələrinin əsərlərini səhnələşdiririk. Həmin səhnəciklərə universitet ictimaiyyəti böyük maraq göstərir.  Məşhur alman şairi Hötenin “ Sehrli şagird” əsərini, eləcə də alman folklor ədəbiyyatından  “Nibelunqlar haqqında nəğmə “ dastanının motivləri əsasında hazırlanmış  kompozisiyanı  tələbə və pedoqoji kollektivə təqdim etmişik.

–Yəqin ki, Bakını, Azərbaycanı gəzmək imkanınız olub...

–Əlbəttə. İlk dəfə Bakıya gələndə Qız qalası, xüsusilə də İçərişəhərin tarixiliyi məni valeh etdi.  Bakının bir sıra tarixi məkanlarında, Atəşgahda, Qobustan dövlət qoruğunda olmuşam.  Quba, Şəki, Qəbələ kimi bölgələrinizə səfərlərim olub. Böyük zövq almışam. Xüsusilə də Şəkinin təbiəti, tarixi yerləri , Şəki xan Sarayı  məni daha çox cəlb edib.

–Almaniya və Azərbaycan arasında təhsil sahəsində əməkdaşlığın daha da inkişaf etdirilməsi üçün tövsiyyələriniz nədir?

–Əlaqələrin yaxşı olmasının nəticəsidir ki, bu gün alman dilinə gənclərin marağı böyükdür. Bakı Slavyan Universiteti ilə Almaniya universitetləri arasında əməkdaşlıq uğurla davam edir. Mütəmadi olaraq  germanistika ilə bağlı tədbirlər, konfrans və  seminarlar  keçirilir, mütəxəssislər  toplanaraq fikir mübadisləsi aparır, orada səslənən  elmi müzakirələrin materialları  sonradan nəşr edilir. Müştərək mövzularla bağlı araşdırmalar aparılır. Məsələn, almanların “Nibelunqlar əfsanəsi” ilə  Azərbaycan xalqının “Kitabi Dədə Qorqud” dastanının ortaq cəhətləri ilə bağlı geniş auditoriyanı əhatə edən simpozium təşkil edildi. Orada müxtəlif universitetlərdə fəaliyyət göstərən ziyalılar, müəllimlər maraqlı çıxışlar etdilər. Düşünürəm ki, Azərbaycanla, xüsusilə də BSU  ilə əməkdaşlığım bundan sonra da uğurla davam edəcək.

Əfsanə BAYRAMQIZI,
“Xalq qəzeti”