Bakıda 41-ci Dünya Skaut Konfransının keçirilməsi Azərbaycanın ictimai-siyasi həyatında olduqca mühüm hadisədir.

Bu əlamətdar tədbirlə bağlı bu günlərdə qəzetimizin fəal oxucuları tərəfindən redaksiyamıza tez-tez telefon zəngləri olur. Dünən zəng edənlərdən biri də “Beynəlmiləlçi əlil döyüşçülər” Fondunun rəhbəri Sərraf Orucov idi. Sərraf müəllim Bakı Konfransının dünya skaut hərəkatına önəmli töhfə verəcəyinə əmin olduğunu bildirərək dedi:

– Bakıda 41-ci Skaut Konfransının keçirilməsi, burada aparılan müzakirələr bir gənc Azərbaycan vətəndaşı olaraq mənim də diqqətimi cəlb etdi. Bu gün gənclər, ziyalılar bütün dünyada, o cümlədən Azərbaycanda çox fəaldırlar. Onlar dünyanın daha sabit olmasını, xalqların və millətlərin sülh, əmin-amanlıq içərisində yaşayaraq daha sürətlə inkişaf etməsini arzulayırlar. Bu məqsədlə uğurla irimiqyaslı tədbirlər həyata keçirirlər.

Hesab edirəm ki, Azərbaycan xalqı öz multikulturalizmi ilə dünya skaut ideallarına tam cavab verir. Belə ki, hazırda dünyada müxtəlif xalqların və dinlərin nümayəndələrinin Azərbaycanda olduğu kimi, mehriban bir şəraitdə, harmoniya içində yaşadığına nümunə tapmaq çox çətindir. 

İnanıram ki, Azərbaycan paytaxtına toplaşan qonaqlarda ölkəmiz, paytaxtımız barədə ən xoş təəssürat yaranacaq. Eyni zamanda, ölkəmizdə skaut hərəkatının sıraları daha da sıxlaşacaq.

Söhbəti qələmə aldı:
Məsaim HACIXANLI,
“Xalq qəzeti”