Artıq ikinci dəfədir ki, ehtiyacı olan və sayılıb-seçilən jurnalistlərə ölkə Prezidenti tərəfindən mənzil hədiyyə edilir. Sevinirəm ki, mənə də yeni binadan mənzil verilib. Həmin gün  mənzillə təmin olunan  digər həmkarlarımın da sevinci yerə-göyə sığmırdı.  Qələm sahibləri həyatlarında ən qiymətli  hədiyyəni alırdılar.

Dövlətin jurnalistlərə bu istiqamətdə yardımı, xüsusən Milli Mətbuat Günü ərəfəsində mənzil hədiyyə etməsi yüzlərlə ailəyə sevinc bəxş etdi. Cəmi 26 illik müstəqillik tariximiz olsa da, dünyanın föqəldövlətlərinə nümunə göstəririk. Bu, bir daha təsdiqləyir ki, əsası ulu öndər Heydər Əliyev tərəfindən qoyulan siyasi kurs möhtərəm Prezidentimiz İlham Əliyev tərəfindən layiqincə  davam etdirilir.

Möhtərəm Prezidentimiz  İlham Əliyevin jurnalistlər üçün tikilmiş növbəti binada Milli Mətbuat Günü münasibətilə mənzillərin paylanması mərasimində iştirakı və 255 mənzilli yeni binanın təməlini qoyması  ilk növbədə  mənzil alan jurnalistlərin, onların ailə üzvlərinin, həmçinin gələcəkdə ev almaq imkanı olan  həmkarlarımın  bayram ovqatına əlavə sevinc qatdı.  Dövlət başçımızın  mərasimdəki proqram xarakterli nitqində toxunulan məsələlər bir daha nümayiş etdirdi ki, Azərbaycanda söz və mətbuat azadlığının təmin edilməsi dövlət siyasətinin prioritetini təşkil edir.  Qürur hissi keçirirəm və fəxr edirəm ki, çalışdığım sahənin –  jurnalistikanın inkişafına qayğı, söz və mətbuat azadlığına ölkəmizdə  böyük  ehtiram var.

Kütləvi informasiya vasitələri əməkdaşlarının sosial müdafiəsinin gücləndirilməsi istiqamətində  davamlı tədbirlər çərçivəsində nümunəvi bir addım kimi mənzillərin bölüşdürülməsindəki ədaləti, obyektivliyi, həmkarlarım arasında ayrı-seçkiliyə  yol verilməməsini də diqqətə çatdırmaq istərdim.  Dövlətimizin başçısı da bu məsələni xüsusi olaraq vurğuladı: “Bu binalarda yaşayan və bundan sonra yaşayacaq jurnalistlər müxtəlif siyasi spektrə aiddir və burada da heç bir ayrı-seçkiliyə yol verilmədi. Müxtəlif siyasi baxışları, müxtəlif partiyaların üzvləri olan insanlar burada bir yerdə bir ailə kimi yaşayacaqlar. Əslində, Azərbaycan cəmiyyəti də bu istiqamətdə inkişaf edir. Azərbaycanda milli həmrəylik var. Azərbaycan cəmiyyəti vahid amal ətrafında birləşib”.

Cənab Prezident qeyd etdi ki, dövlətin siyasətinin mərkəzində Azərbaycan dövlətinin və vətəndaşların marağı dayanır.  Jurnalistlər Azərbaycanın haqq səsini dünyaya yaymaqda dövlət başçımıza  yardım edirlər. Hər birimiz bu istiqamətdə səylərimizi  daha da artırmalıyıq. Baxın, dünyanın hansı ölkəsində Azərbaycanda olduğu kimi, jurnalistlərə, yaradıcı insanlara belə yüksək diqqət və qayğı göstərilir? Təbii ki, bu qayğı yalnız Azərbaycandadır.

Təəssüf ki, ev ala bilməyən bəzi həmkarlarım bu nəcib işə kölgə salmağa çalışırlar. Onlar tələsik qərar qəbul etməkdən çəkinməli, dünyada analoqu olmayan bu xeyirxahlığa ləkə vurmağa çalışmamalıdırlar. Yəqin ki, növbəti illərdə onlar da dövlətimizin bu qayğısından yararlanacaqlar. Axı, 255 mənzilli yeni binanın da təməli qoyuldu. Özü də dövlət başçısı tapşırıq verdi ki, 3 il ərzində bina hazır olmalıdır. Bütün bunlara görə  yalnız Prezident İlham Əliyevə minnətdar olmalıyıq.

 Kifayət ƏLİYEVA,
Azərbaycan  Dövlət İnformasiya Agentliyinin (AZƏRTAC)
redaksiya müdiri