Bu fikri Dünya Gənc Türk Yazarlar Birliyinin Təsisçilər Şurasının başqanı Əkbər Qoşalı  səsləndirdi. O, dedi:

– Mülki insanların, xüsusilə də körpələrin  qətlə yetirilməsi humanizmə, insan hüquqlarına və demokratik prinsiplərə ziddir. Təəssüf ki, Azərbaycan  artıq 20 ildən çoxdur ki, Ermənistanın hərbi təcavüzkarlıq siyasətindən, qanlı terror aktlarından əziyyət çəkir.

Azərbaycanın mülki vətəndaşlarına qarşı törədilən növbəti sonuncu qanlı akt  beynəlxalq ictimaiyyətə bir daha Ermənistanın   insan hüquqları və s. kimi beynəlxalq qanunvericiliyə və konvensiyalara məhəl qoymayıb, onları kobud şəkildə pozduğunu nümayiş etdirdi.

2017-ci il iyulun 4-də  Ermənistan hərbi birləşmələri  növbəti dəfə atəşkəs rejimini pozaraq, dinc azərbaycanlı əhalinin yaşadığı kəndləri iriçaplı silahlardan atəşə tutub. Erməni tərəfinin təxribatı nəticəsində Füzuli rayonu, Alxanlı  kənd sakinləri – ikiyaşlı Quliyeva Zəhra Elnur qızı (2015)  və 50 yaşlı Quliyeva Sahibə İdris qızı (1966) qətlə yetiriliblər, Quliyeva Sərvinaz İltifat qızı isə ağır yaralanaraq, xəstəxanaya yerləşdirilib.

Beynəlxalq ictimaiyyət Ermənistanın hərbi təxribatı nəticəsində iki yaşlı Zəhra Quliyevanın qətlinə şahid oldu.  Azərbaycanın ATƏT-in Minsk qrupu çərçivəsində münaqişənin sülh  danışıqları yolu ilə həllində əlindən gələni etməsinə baxmayaraq, təəssüf ki, Ermənistan beynəlxalq hüququn tələblərini pozaraq, qanlı vandalizm aktlarını  davam etdirir.

Ermənistan-Azərbaycan, Dağlıq  Qarabağ münaqişəsi hələ də Cənubi Qafqaz bölgəsində stabilliyə təhdid olaraq qalmaqdadır.  İyirmi ildən çoxdur ki, Azərbaycanın 20 faiz ərazisi Ermənistanın işğalı altındadır. Bir milyondan çox məcburi köçkün hələ də doğma yurdlarına qayıda bilmir, onların hüquqları Ermənistan tərəfindən pozulmaqda davam edir. 1994-cü ildə atəşkəs razılığının əldə edilməsinə baxmayaraq, Ermənistan mütəmadi olaraq, Azərbaycan kəndlərinə, yaşayış məntəqələrinə və mülki insanlara atəş açaraq atəşkəsi pozur.

Beynəlxalq ictimaiyyət, xüsusilə də BMT Azərbaycanın ərazi bütövlüyünü tanıyır ki, oraya Ermənistan tərəfindən işğal edilmiş ərazilər də daxildir. Ermənistan beynəlxalq hüquqa, eləcə də münaqişənin həlli ilə bağlı qəbul edilmiş qətnamə və sənədlərə  hörmət etmir və BMT-nin münaqişənin həlli ilə bağlı və erməni hərbi birləşmələrinin işğal edilmiş ərazilərdən çıxarılmasını tələb edən 4 qətnaməsini  (№ 822, 853, 874 və 884)  yerinə yetirməkdən imtina edir.

Bu gün türk xalqlarının yaşadığı coğrafiyaya baxdıqda  göz yaşının, günahsız insanların fəryadlarının, Zəhra kimi yüzlərlə cocuğun Kərkükdə, Hələbdə, Kabildə öldüyünün şahidi oluruq. Bu günahsız mülki insanların faciəsi, xüsusilə də Zəhranın qətli təkcə Azərbaycan xalqının acısı deyil. Bu, həm də türk-müsəlman aləminin insanlıq faciəsidir. Nəhayət, Zəhranın qətli insanlığın faciəsidir. Yüzlərlə ailə Qarabağ müharibəsində Ermənistanın hərbi təcavüzü nəticəsində  yaxınlarını, uşaqlarını itirib. Atəşkəs rejiminin olmasına baxmayaraq, Ermənistan yenə də qanlı cinayətlərini davam etdirir. Erməni cinayətləri bununla bitmir.

İki azərbaycanlı mülki vətəndaş  –  Dilqəm Əsgərov və Şahbaz Quliyev işğal edilmiş Azərbaycan torpaqlarında—doğulub böyüdükləri torpaqda erməni girovluğunda  saxlanılırlar. Onlar, üç nəfər doğulub boya-başa çatdıqları kəndi görmək, yaxınlarının məzarlarını ziyarət etmək istəyirdilər.  2014-cü il iyulun 11-də  bir mülki vətəndaşımız  – Həsən Həsənov vəhşicəsinə öldürülmüş, digər iki azərbaycanlı isə girov götürülmüşdür.  Ermənistan onları geri qaytarmaqdan imtina etməklə, beynəlxalq insan hüquqları bəyannaməsini və beynəlxalq hüququ pozmaqda davam edir. Biz bütün beynəlxalq ictimaiyyəti  ədaləti dəstəkləməyə və Ermənistandan bu girovların azad edilməsini tələb etməyə çağırırıq. Onların da öz ailəsi və övladları ilə görüşməyə haqqı var.

Beynəlxalq və siyasi təşkilatlar, insan hüquqları institutları, QHT-lər bu cinayət aktına göz yummamalı, Ermənistanı ifşa etməlidirlər.

Dağlıq Qarabağ münaqişəsinin həll edilməmiş qalması Cənubi Qafqaz regionunun sabitliyi və təhlükəsizliyi baxımından və eləcə də dünya üçün  əsas təhlükədir. Biz beynəlxalq ictimaiyyəti bəşəriyyətə qarşı yönəlmiş erməni vandalizminə son qoymağa və işğal edilmiş torpaqlarda  Azərbaycanın suverenliyinin bərpa olunmasına dəstək olmağa çağırırıq.  Çünki biz də regionda sülh və təhlükəsizlik şəraitində yaşamaq istəyirik.

Təqdim etdi: 
Əfsanə BAYRAMQIZI,  “Xalq qəzeti”