Dünən Bakıda IV Beynəlxalq Mədəniyyətlərarası Dialoq Forumu öz işini başa çatdırdı. Üç gün davam edən tədbirdə dünyanın 120 ölkəsindən hazırkı və sabiq dövlət və hökumət başçıları, nazirlər, alimlər və ictimai xadimlər daxil olmaqla 800-dən artıq nümayəndə iştirak etdi. Forum çərçivəsində “Mədəniyyətlərarası dialoqun təşviqində innovativ yanaşmaların təbliği” mövzusuda təşkil olunan panel iclasının fasilə müddətində tədbirin iştirakçısı  Anna Maria Ollsonla görüşüb forumla bağlı təəssüratlarını öyrəndik.

Qonaq bildirdi ki, o, “Give something back to Berlin” layihəsinin təsisçisidir. Onun rəhbərlik etdiyi layihənin məqsədi mühacirlərin  yerli ictimaiyyətlə qarşılıqlı fəaliyyətini təmin etmək, həmçinin yeni gələnlərin cəmiyyətə inteqrasiyası prosesinə öz töhfəsini verməkdir. 

Anna Maria Ollson qeyd etdi ki, biz əldə etdiyimiz məlumatlara istinadən Almaniyaya gələn əcnəbilərə onların problemlərinin aradan qaldırılmasında yardımçı oluruq. Mühacirlərə lazımi dəstəyi verməyə çalışırıq.  Qonaq dedi ki, hazırda məişət zorakılığı, azyaşlı uşaqların əməyinin istismarı və digər bu qəbildən olan xoşagəlməz hallar müasir dünyanın üzləşdiyi bəlalardır. Bu kimi halların aradan qaldırılması üçün bu cür platformaların yaradılmasına böyük ehtiyac var. Qonaq forumun belə yüksək səviyyədə təşkilinə görə Azərbaycan dövlətinə, ölkə Prezidenti cənab İlham Əliyevə və Birinci vitse – prezident Mehriban xanım Əliyevaya təşəkkür etdi.

O qeyd etdi ki, Azərbaycan son illər bir sıra tədbirlərə uğurla ev sahibliyi edir. Təbii ki, bütün bunlar dünya ictimaiyyəti tərəfindən yüksək qiymətləndirilir. Ölkəniz tolerantlığın göstəricisinə görə nəinki regionda, hətta mən deyərdim ki, dünyada  ön sıralarda dayanır. Azərbaycan müxtəlif dinlərin, millətlərin nümayəndələrinin bir arada yaşadığı mehriban, qonaqpərvər və sülhsevər ölkədir.

Elçin ABBASOV,
“Xalq qəzeti”