UNESCO-nun baş direktoru İrina Bokova IV Mədəniyyətlərarası Dialoq Forumu haqqında hələ hazırlıq tədbirləri görülən vaxtda öz fikirlərini bildirmişdi. Hazırlıqla bağlı keçirilən beynəlxalq tədbirdə Azərbaycan hökumətinin beynəlxalq miqyasda mədəniyyətlərarası dialoqun inkişafına verdiyi töhfələri alqışlayaraq “Bakı prosesi”nin həm mədəniyyətlərarası dialoqun qurulmasında, həm də beynəlxalq təşkilatların əməkdaşlığının inkişafında vacib platforma olduğunu qeyd etmiş və rəhbəri olduğu qurumun IV Dünya Mədəniyyətlərarası Dialoq Forumunun təşkilində vacib tərəfdaş rolunda çıxış edəcəyini bildirmişdi.

Xanım Bokova indi Bakıdadır. IV Ümumdünya Mədəniyyətlərarası Dialoq Forumunda çıxış edərək bildirib ki, bəşəriyyət bir ailədir. Bu, UNESCO-nun dünyaya baxışıdır. Biz bəşəriyyətin zənginliyini qorumalıyıq. UNESCO üçün sülh, əmin-amanlıq vacibdir. Həmrəyliyə, anlaşmaya ehtiyacımız var. Biz innovasiyalara rəvac verməli, Azərbaycan Prezidentinin qeyd etdiyi kimi, müxtəliflikləri qəbul etməliyik.

UNESCO baş direktoru gənc nəslin radikalizmdən qorunması üçün proqramlar həyata keçirdiklərini söyləyib: “Biz qlobal problemlərə, münaqişələrin həllinə cavab verəcək fəaliyyət həyata keçirməliyik. Maarifləndirmə səviyyəsini artırmalıyıq. İrqçiliyə, potensial soyqırımlarına qarşı önləyici tədbirləri, dialoqu, sülhü daha da gücləndirməliyik”.

Hazırladı:
M.MÜKƏRRƏMOĞLU,
“Xalq qəzeti”