Bakıda IV Ümumdünya Mədəniyyətlərarası Dialoq Forumu çərçivəsində panel müzakirələr zamanı Bolqarıstanın vitse-prezidenti İliana İotova bildirib ki, ekstremizm din və sərhəd tanımır.

 İliana Yotova qeyd edib ki, bu gün terrorçuluq mürəkkəb forma almışdır: “Dini və ideoloji mübarizə bu gün təhlükəyə çevrilib. Biz buna son qoymalıyıq. Radikallıq indi xalqların mədəni irsinə də təhlükə törədir”.

Vitse-prezident terrorçuluğun, baş verən hadisələrin  səbəblərini müəyyən etmədən ekstremizmlə effektiv mübarizə aparmağın mümkün olmadığını vurğulayıb: “Bunun üçün biz real siyasi iradə nümayiş etdirməliyik”.

İliana İotova bildirib ki, bu məsələdə əsas rolu gənclik oynayır: “Məni bizim gənclərimiz çox narahat edir. Biz təkcə onların müdafiəsi ilə məhdudlaşmamalıyıq, onlara qulaq asmaq, fikirlərini dinləmək lazımdır. Biz uşaqlarımıza təhsil verməliyik. Onları erkən yaşlardan maarifləndirməli, gənclərdə ailəyə, doğma ölkəyə məhəbbət, eləcə də başqalarına, başqa mədəniyyətlərə və ölkələrə hörmət aşılamaq lazımdır”.