IV Mədəniyyətlərarası Dialoq Forumunda dünyanın müxtəlif ölkələrindən hazırkı və sabiq dövlət başçıları, nazirlər, alimlər və ictimai xadimlər iştirak edirlər.

Bakıda keçirilən IV Mədəniyyətlərarası Dialoq Forumunun iştirakçısı, Afrika Gənclər Assosiasiyasının  əlaqələndiricisi Daniel Da Hien forumla bağlı fikirlərini qəzetimizə müsahibəsində bildirdi: “Bu forum sülhsevər, tolerant və beynəlmiləl bir ölkənin, Azərbaycanın dünyadakı sülh və sabitlik işinə verdiyi böyük töhfənin bariz göstəricisidir”.

Müsahibimiz bildirdi ki, o, tədbirdə Burkino-Fasonu təmsil edir. Qonaq Bakıda təşkil olunan IV Ümumdünya Mədəniyyətlərarası Dialoq Forumunun istər dünya ölkələri, istərsə də təmsil etdiyi Afrika dövlətləri üçün mühüm əhəmiyyətə malik olduğunu vurğuladı. Bildirdi ki, forum dünyadakı problemləri, onların həlli yollarını, bu istiqamətdə fikirləri digər məsələləri müzakirə etmək üçün geniş imkanlar yaradır. Milli, mədəni, dini müxtəliflik insanın özünü başqasından üstün tutması üçün əsas vermir. Bütün bunlar isə cəmiyyəti bir çox problemlərdən xilas edə bilər.

Daniel Da Hien qeyd etdi ki, Bakı həqiqətən gözəl şəhərdir. İnsan Xəzərin qoynunda yerləşən bu şəhərə valeh olur. Mən əvvələr də Bakının  gözəlliyi haqqında eşitmişdim. Lakin indi “Bakı prosesi” layihəsi çərçivəsində sizin doğma şəhərinizdə olmaq mənə qismət oldu. Mən eşitdiklərimin canlı şahidi oldum.

Elçin ABBASOV,
“Xalq qəzeti”