Azərbaycan Prezidentinin təşəbbüsü ilə əsası qoyulmuş “Bakı prosesi” çərçivəsində yüksək səviyyədə keçirilən Ümumdünya Mədəniyyətlərarası Dialoq forumları, BMT-nin Sivilizasiyalar Alyansının 7-ci Qlobal Forumu, habelə Bakı Beynəlxalq Humanitar forumları, Dünya Dini Liderlərinin Sammiti, Avropa Oyunları və artıq bu günlərdə keçiriləcək IV İslam Həmrəyliyi Oyunları Azərbaycanı multikulturalizm, sivilizasiyalararası münasibətlərin tənzimlənməsi mərkəzinə çevirib. Bunu Trend-ə Ombudsman Aparatının rəhbəri Aydın Səfixanlı deyib.

A.Səfixanlı qeyd edib ki, iqtisadi, sosial və mədəni hüquqların təmini dövlətlər üzərində pozitiv öhdəliklər müəyyən etməklə, bu hüquqların təmini istiqamətində dövlətlər tərəfindən əməli addımların atılmasını ehtiva edir.

Aparat rəhbəri deyib ki, Azərbaycan dövləti insan və vətəndaş hüquqlarının və azadlıqlarının, o cümlədən öz vətəndaşlarına layiqli həyat səviyyəsinin təmin edilməsini özünün ali məqsədi olaraq müəyyən edib və bu istiqamətdə əməli tədbirlər həyata keçirməkdədir.

Azərbaycan Prezidenti İlham Əliyevin məqsədyönlü və uzaqgörən siyasəti nəticəsində ölkəmiz dünyanın mədəniyyət və mədəniyyətlərarası dialoq mərkəzlərindən birinə çevrilib: “Xalqımızın çoxəsrlik tolerant və mehriban birgə yaşama mədəniyyəti dünya sivilizasiyaları arasında münasibətlərin tənzimlənməsində və inkişafında, o cümlədən mədəni hüquqların daha səmərəli təmin olunmasında nümunə kimi göstərilir. Azərbaycan dövlətinin bu istiqamətdə həyata keçirdiyi tədbirlər mədəni müxtəlifliyə dəstəyin bariz nümunəsi olmaqla, dünya dövlətlərinin bu müsbət təcrübədən yararlanmasına imkan yaradır. Azərbaycan artıq regional səviyyədə deyil, qlobal miqyasda təşəbbüslərlə çıxış edərək dünya sivilizasiyaları arasında münasibətlərin tənzimlənməsində, tolerant mühitin formalaşdırılmasında tətbiq olunacaq siyasəti formalaşdırmaqdadır”.