Bakıda keçirilən Ümumdünya Mədəniyyətlərarası Dialoq Forumu böyük əhəmiyyətə malik tədbirdir. Bu gün bəşəriyyət ciddi çağırışlarla üz-üzədir, hər gün sosial ədalətsizliklərlə, irqi problemlərlə qarşılaşırıq. “Bakı prosesi” mesajı problemlərin birgə həllinə böyük ümid verir. Biz bu forumda təkcə müzakirələr aparmaqla kifayətlənməyəcək, həm də konkret addımların atılmasına çalışacağıq.

Bu fikirləri AZƏRTAC-a müsahibəsində UNESCO-nun mədəniyyətlərarası və dinlərarası 2-ci akademik forumunun iştirakçısı - Mədəniyyətlərarası anlaşma üçün dinlərarası dialoqda UNIWIN şəbəkəsinin əlaqələndiricisi Fəthi Mənsuri deyib.

“Mədəniyyətlərarası dialoq çərçivəsində bundan sonra da UNESCO ilə əməkdaşlıq məsələlərini müzakirə edəcəyik, həmçinin 2015-ci ildə birinci akademik forumda qurulmuş əlaqələri daha da genişləndirməyə çalışacağıq”, - deyə F.Mənsuri bildirib.

Bakının beynəlxalq tədbirlərə uğurla ev sahibliyi etdiyini vurğulayan F.Mənsuri gələn həftə başlayacaq IV İslam Həmrəyliyi Oyunlarının bütün iştirakçılarına uğurlar arzulayıb.