Yola saldığımız il Azərbaycanın iqtisadi, siyasi və mədəni həyatında bir sıra əlamətdar hadisələrlə yadda qalacaq. Prezident İlham Əliyevin rəhbərliyi altında həyata keçirilən daxili və xarici siyasət Azərbaycanın beynəlxalq aləmdəki nüfuzunu daha da artırdı. Xüsusilə, Ermənistan - Azərbaycan, Dağlıq Qarabağ münaqişəsinin nizamlanmasında dövlət başçımızın yeritdiyi düşünülmüş, məntiqli siyasət Ermənistanı bir daha ifşa etdi, bu ölkənin işğalçı, təcavüzkar olması barədə beynəlxalq ictimaiyyətdə tam təəssürat yaratdı. Artıq dünyanın bütün ölkələri münaqişənin nizamlanmasında Azərbaycan Prezidentinin mövqeyini dəstəkləyir.
2010-cu il Azərbaycanın tarixində dördüncü çağırış Milli Məclisə seçkilərin ili kimi də daxil oldu. Bu seçki bir daha təsdiqlədi ki, Azərbaycan demokratik, şəffaf, azad və ədalətli seçki keçirməyə qadir bir ölkədir. Arzu edirəm ki, növbəti illərdə də bu uğurları daha da artıraq. Mən bütün soydaşlarımızı Prezident İlham Əliyevin ətrafında sıx birləşməyə çağırıram. Birlik olan yerdə hər bir məqsədə çatmaq olar. Azərbaycan Prezidentinin son 7 ildə gördüyü işlər hər birimizin gözləri qarşısındadır. Ona dəstək verməli, arxa-dayaq olmalıyıq ki, xalqımızın əsas problemi olan Dağlıq Qarabağ münaqişəsinin də Azərbaycanın ərazi bütövlüyü çərçivəsində həllinə nail olaq. Mən buna inanıram və hamını yeni ildə bu amal uğrunda birləşməyə çağırıram.
Dünya Azərbaycanlılarının Həmrəylik Günü və Yeni il bayramı münasibətilə bütün azərbaycanlıları təbrik edir, onlara bol-bol sevinc, xoşbəxtlik arzulayıram.{nl}