Dünən Bakıda “Beynəlxalq münasibətlərin gələcəyi: güc və maraqlar” mövzusunda keçirilən V Qlobal Bakı Forumu öz işini uğurla başa çatdırıb. Bu nüfuzlu tədbirin çox sayda iştirakçıları arasında Avropa İttifaqının Cənubi Qafqaz üzrə keçmiş xüsusi nümayəndəsi, hazırda isə İsveçin Suriyadakı səfiri kimi fəaliyyət göstərən Piter Semnebi də var.

Əməkdaşımız forum çərçivəsində təşkil olunan panel iclaslarının birində tənəffüs zamanı P.Semnebi ilə görüşərək ondan tədbir barədə fikir və mülahizələrini qəzetimizin oxucuları ilə bölüşməsini xahiş edib.

P.Semnebi məmnuniyyətlə deyib:

– Düşünürəm ki, Azərbaycan paytaxtında belə bir aktual mövzuda beynəlxalq tədbirin keçirilməsi olduqca böyük əhəmiyyət kəsb edir. Bu gün dünyanın çox yerində ağır zorakılıqlar, münaqişələr baş verir. Bunların qarşısı alınmazsa, daha böyük fəlakətlər baş verə bilər. Hesab edirəm ki, Bakı Forumu məhz belə bir  humanist missiyaya xidmət edir. 

Forumun açılış mərasimi zamanı Azərbaycan Prezidenti cənab İlham Əliyevin nitqini maraqla dinlədim. Dövlət başçısı hər dəfə olduğu kimi, bu dəfə  də Dağlıq Qarabağ münaqişəsinin həll olunmamasından narahatlığını bildirdi. Həqiqətən, Dağlıq Qarabağ münaqişəsinin hələ də həllini tapmaması narahatlıq doğurur.

 Bildiyiniz kimi, vaxtilə mən Avropa İttifaqının Cənubi Qafqaz üzrə xüsusi nümayəndəsi olmuşam. Münaqişə barədə geniş məlumatlıyam. Bu münaqişənin ədalətli həlli bölgə xalqlarına inkişaf və tərəqqi gətirə bilər. Mən bu istiqamətdə irəliyə doğru addımlar atılacağına ümid etmək istərdim.

Sevindirici haldır ki, V Qlobal Bakı Forumu  yüksək səviyyədə təşkil olunub. Tədbirə qatılan iştirakçıların sayının çox olması müsbət haldır. Hesab edirəm ki, belə müzakirələr yalnız Azərbaycan yox, həm də digər ölkələr üçün də faydalıdır.

Söhbəti qələmə aldı: 
Məsaim ABDULLAYEV, 
“Xalq qəzeti”