Azərbaycan Respublikasının Prezidenti İlham Əliyevin bu ili “İslam Həmrəyliyi ili” elan etməsi bütün Azərbaycan dindarları üçün böyük bir töhfədir.

AZƏRTAC xəbər verir ki, bu sözləri martın 15-də Bakıda “İslam həmrəyliyi – zamanın çağırışı” mövzusunda keçirilən beynəlxalq konfrans çərçivəsində jurnalistlərə müsahibəsində Qafqaz Müsəlmanları İdarəsinin (QMİ) sədri şeyxülislam Allahşükür Paşazadə deyib.

Beynəlxalq konfransın əhəmiyyətindən danışan QMİ sədri bildirib ki, konfrans irqi, milli, etnik və digər zəmində baş verən qarşıdurmalar fonunda dünyada sülhə və onun qorunmasına xidmət edir. "Bu ilin ölkəmizdə “İslam Həmrəyliyi ili” elan edilməsi dünyada dinlərarası münasibətlərin düzgün qurulması, sabitliyin yaradılması üçün böyük bir vəsilə olacaq. Bu, həm də siyasi bir addımdır. Yaxın Şərqdə baş verən hadisələr, bütün Avropada və başqa ölkələrdə tüğyan edən antisemitizm, islamofobiya meyilləri, çəkilən sərhədlər onu göstərir ki, bu addımları İslamın mahiyyətini anlamayanlar atırlar. Əslində İslam sülh, qardaşlıq, dostluq dinidir. İslam bütün dinləri qəbul edir, bütün dinlərlə qardaşlıq münasibətləri qurur. İslam bütün dinlərlə əməkdaşlıq etməkdədir. Azərbaycan bir nümunədir. Bu konfransın keçirilməsi və xarici qonaqların bura təşrif buyurması təqdirəlayiqdir”, - deyə şeyxülislam bildirib.

Qafqaz Müsəlmanları İdarəsinin sədri qeyd edib ki, ötən ilin ölkəmizdə “Multikulturalizm ili”, bu ilin isə “İslam Həmrəyliyi ili” elan edilməsi Azərbaycan dindarları üçün mühüm töhfədir. Ulu öndər Heydər Əliyevin ocağından bəhrələnən Prezident İlham Əliyevin atdığı bu addımlar ümummilli liderin uzaqgörən siyasətinin davamıdır.

Ermənilərin özlərini yazıq millət kimi dünyaya tanıdaraq, xristian dinini də yanlış müstəvidə təqdim etmələrinin təəssüf doğurduğunu deyən Allahşükür Paşazadə vurğulayıb: “Biz xristianlığın əleyhinə deyilik, biz heç bir dinin əleyhinə deyilik. Bütün dinlərlə əlaqə yaratmağın tərəfdarıyıq”.