Moskva Beynəlxalq Multikulturalizm Mərkəzinin direktoru Natalya Krasovskayanın fikrincə, Bakı İslam Həmrəyliyi Oyunlarının keçirilməsi üçün təsadüfən seçilməyib.

O, AZƏRTAC-ın müxbirinə müsahibəsində deyib: “Bu il İslam Həmrəyliyi Oyunları “Həmrəylik bizim gücümüzdür” şüarı ilə keçəcək. Çox düzgün şüardır: indiki keşməkeşli dövrümüzdə planetimizdə sülh naminə bütün ölkələrin səylərinin birləşdirilməsinin zəruri olduğunu bütün mümkün üsullarla təbliğ etmək lazımdır. Oyunların keçirilməsi üçün Bakı təsadüfən seçilməyib. Onu mübaliğə etmədən multikulturalizmin paytaxtı, müsəlman, pravoslav və yəhudilərin dinc yanaşı dostluq şəraitində yaşadığı şəhər adlandırmaq olar”.

2017-ci il İslam Həmrəyliyi Oyunlarının ölkələr və xalqlar arasında dialoqa kömək edəcəyinə əmin olduğunu bildirən N.Krasovskaya fikrini belə tamamlayıb: “Əlbəttə, bu Oyunlar böyük müvəffəqiyyətlə keçəcək, həm tamaşaçıların, həm də iştirakçıların ürəklərində ən xoş hisslər və xatirələrlə qalacaq. Axı artıq Azərbaycan dünya miqyaslı hər hansı tədbiri ən yüksək səviyyədə təşkil etmək bacarığını dəfələrlə sübuta yetirib”.

Fəridə Abdullayeva,
AZƏRTAC-ın xüsusi müxbiri

Moskva