Olimpiya Oyunları tarixində taekvando üzrə ilk dəfə “Rio-2016”-da medal qazanıldı. Eyni zamanda, bu mötəbər yarışlarda 4 taekvondoçudan ibarət komandamız 1-i qızıl olmaqla 3 medal əldə etdi.

Dünya Taekvando Federasiyasının 2016-cı ildəki fəaliyyətinin yekunlarına görə Azərbaycan Taekvando Federasiyası “2016-cı ilin ən yaxşı milli federasiyası” nominasiyasında qalib elan olunub. “İlin ən yaxşı kişi məşqçisi” adına isə Azərbaycanın kişilərdən ibarət milli komandasının baş məşqçisi Reza Mehmandoust sahib olub.

Olimpiya oyunlarında Azərbaycanı yüksək səviyyədə təmsil etdiyimə görə özümü xoşbəxt sayır, Azərbaycanın Olimpiya çempionu adını daşımağımla qürur duyuram. Azərbaycan Respublikasının Prezidenti İlham Əliyev məni 2016-cı ilin idman yekunlarına həsr olunmuş mərasimdə Milli Olimpiya Komitəsinin “Olimpiya” ordeni ilə təltif etdi. Gələcəkdə yeni idman uğurları ilə mənə göstərilən yüksək etimadı doğrultmaq, dünyanın ən nüfuzlu idman ölkəsi olan Azərbaycanımızın bayrağını mötəbər yarışlarda yüksəklərə qaldırmaq, dövlət himnini səsləndirmək üçün bundan sonra da var qüvvəmlə çalışacağam.

Yeni ilin astanasında xalqımız həm də Dünya Azərbaycanlılarının Həmrəyliyi Gününü qeyd edir. Fürsətdən istifadə edib xalqımızı bu gözəl bayramlar münasibətilə təbrik edir, hər bir vətəndaşımıza  firavan həyat arzulayıram. Qoy yeni ildə nailiyyətlərimiz daha bol olsun.

Radik İSAYEV,
Olimpiya çempionu