Bu günlərdə Bakıda Dünya İnformasiya Agentliklərinin V Konqresi, eləcə də Asiya və  Sakit Okean Ölkələri İnformasiya Agentlikləri Təşkilatının  (OANA) XVI Baş Assambleyası öz  işini uğurla başa vurdu.

Tədbirdə iştirak edən ­Malayziyanın  “Bernama” Agentliyinin baş ­redaktoru ­Zakariya bin Abdul Vahab  öz  təəs­sü­ratlarını qəzetimizlə bölüşdü. Qonaq bildirdi ki, dünyanın hər yerindən xəbər agentliklərini təmsil edən insanların bir araya gəlməsi sevindirici haldır: “Bütün konqres iştirakçıları adından deyə bilərəm ki, tədbir yüksək səviyyədə keçdi. Biz dəfələrlə Azərbaycanın mötəbər tədbirlərə ev sahibliyi etməsinin şahidi olmuşuq. Bu, ölkənizin informasiya sahəsində də qazandığı növbəti uğurudur”.

Zakariya bin Abdul Vahab qeyd etdi ki, Azərbaycan Prezidenti çox yüksək intellektual və praqmatik düşüncəli liderdir. Onun bu tədbirə önəm verməsi dövlət başçınızın mediaya göstərdiyi diqqət və qayğının bariz nümunəsidir. Qonaq Azərbaycanın son illər regionun lider dövlətinə çevrilməsini və rəsmi Bakının informasiya sahəsində mövqeyinin ciddi şəkildə gücləndiyini qeyd etdi.

Qonaq son illər paytaxt Bakının həddən artıq gözəlləşdiyini və şəhərdə gözoxşayan göydələnlərin inşa edildiyini bildirdi. Zakariya bin Abdul Vahab Bakıya bir daha qayıdacağını dedi.

Anar TURAN,
“Xalq qəzeti”