Bu günlərdə Bakıda Heydər Əliyev Fondunun və AzərTAC-ın təşkilatçılığı ilə keçirilən Dünya İnformasiya Agentliklərinin V Konqresinin iştirakçıları arasında Meksikanın “Notimex” agentliyinin baş icraçı direktoru Aleksander Ramos Eskivel də vardı. Tədbir çərçivəsində təşkil olunan seminarlardan birində fasilə zamanı qonaqla görüşərək ondan tədbirin əhəmiyyəti haqqında fiklirlərini bildirməsini xahiş etdik. Aleksander Ramos Eskivel bunları dedi:

– V Konqresdə müasir dünya ­jurnalistikasını düşündürən və narahat edən bir sıra aktual məsələlər müzakirə olunur. Şəxsən mən hesab edirəm ki, çağdaş dönəmdə qlobal media təmsilçiləri qarşısında ciddi vəzifələr meydana çıxıb. Bu, ilk növbədə, modern texnologiyaların qlobal informasiya axınının kəskin sürətləndirməsi, bu zaman, çox təəssüf ki, qeyri-obyektiv, bəzən, hətta qeyri-ciddi xəbərlərin də yer almasıdır. Bunlar bizi narahat etməyə bilməz.

Düşünürəm ki, jurnalistlər zamanın yeni çağırışlarına böyük məsuliyyət hissi ilə yanaşmalıdırlar. Bu kontekstdə dünyanın ən müxtəlif ölkələrindən olan media mənsublarının Bakıda bir araya gəlməsi və təcrübə mübadiləsi aparması təqdirəlayiq haldır.

Fürsətdən istifadə edərək tədbirin yüksək səviyyədə təşkili üçün göstərdikləri səylərə görə təşkilatçılara dərin minnətdarlığımı bildirmək istəyirəm. Konqresdə ən müxtəlif mövzularda səmərəli müzakirələr üçün hər cür şərait yaradılıb. Ümid edirəm ki, tədbirdə səslənən dəyərli fikirlər və təkliflər dünya mediasının inkişafına öz töhfəsini verəcək.

Bir daha vurğulamaq istəyirəm. Məni ən çox razı salan odur ki, Bakıda ­faydalı təcrübə mübadiləsi apara bildik. 

Söhbəti qələmə aldı:
Məsaim ABDULLAYEV,
“Xalq qəzeti”