Noyabrın 16-17-də Bakıdakı Heydər Əliyev Mərkəzində Heydər Əliyev Fondunun və AZƏRTAC-ın təşkilatçılığı ilə Dünya Xəbər Agentliklərinin V Konqresi keçirilib. Tədbirdə beş qitəni, 80 ölkəni və dünyanın 100-dən artıq aparıcı xəbər agentliyini təmsil edən 200 nümayəndə iştirak edib. Müxbirimiz konqres iştirakçısı ilə görüşərək onun tədbirlə bağlı təəssüratlarını öyrənib.

Sergey MİXAYLOV, Rusiyanın TASS agentliyinin baş direktoru:

– Bakıda dünyanın aparıcı informasiya agentliklərinin təmsil olunduğu belə böyük bir tədbirin keçirilməsi təqdirəlayiq haldır. Bilirik ki, Bakıda bu cür beynəlxalq əhəmiyyətli tədbirlərin təşkili artıq çoxdan xoş ənənəyə çevrilib. Burada bizə göstərilən yüksək qonaqpərvərliyə və eyni zamanda, tədbirin yüksək səviyyədə təşkilinə görə Azərbaycana, şəxsən Prezident İlham Əliyevə minnətdarlığımı bildirirəm.

Konqresin açılışı zamanı Azərbaycan Prezidenti İlham Əliyevin çıxışını maraqla dinlədik. Prezident qeyd etdi ki, belə vacib, qlobal və beynəlxalq tədbirə ev sahibliyi etmək Azərbaycan üçün böyük şərəfdir. O, eyni zamanda, qonaqların Azərbaycan ­haqqında daha dolğun məlumat əldə edəcəyini, ölkənin inkişafının şahidi olacağını bildirdi.

Əlbəttə, qonaqlar Azərbaycanla, onun günbəgün gözəlləşən paytaxtı Bakı şəhəri ilə yaxından tanış olmaq imkanı qazandılar və bu tanışlıqdan məmnun qaldılar. Ölkənin müstəqillik illərində böyük inkişaf yolu keçdiyinin şahidi olduq. Prezidentin qeyd etdiyi kimi, bu ölkə müasirdir, dinamik inkişaf edir və gələcək üçün nəhəng potensiala malikdir. Biz Azərbaycanda müstəqil medianın inkişafına da yüksək qayğı və diqqətlə yanaşıldığını, bunun Azərbaycan hökuməti üçün prioritet sahələrdən biri olduğunu gördük. İnanırıq ki, gələcəkdə Azərbaycan mətbuatı, o cümlədən, elektron media daha böyük nailiyyətlər qazanacaq.

Söhbəti yazdı:
Paşa ƏMİRCANOV, 
“Xalq qəzeti”